आर्थिक वर्षको सुरुमै सरकारले उठाउन थाल्यो आन्तरिक ऋण, १० अर्बको विकास ऋणपत्र बिक्रीमा

१७ साउन, काठमाडौं । आर्थिक वर्षको सुरुवाती महिना साउनबाटै सरकारले आन्तरिक ऋण उठाउन सुरु गरेको छ । चालू आर्थिक वर्षको  बजेटमा तय गरेको वार्षिक लक्ष्य अनुसार यही साउनदेखि नै आन्तरिक ऋण उठाउन लागिएको हो । यसै अनुसार नेपाल राष्ट्र बैंकले १० अर्ब रूपैयाँ बराबरको विकास ऋणपत्र बिक्रीका लागि सूचना जारी गरेको छ । ऋणपत्रका लागि भोलि बिहीबार साउन १८ गते दिउँसो ३ बजेसम्म बोलकबोल गर्न सकिने राष्ट्र बैंकको जनाएको छ । उक्त विकास ऋणपत्रको परिपक्व अवधि ६ वर्षको रहेको छ । 

ऋणपत्रको ब्याजदर बोलकबोलबाट निर्धारण हुनेछ । ऋणपत्र बैंक तथा वित्तीय संस्था, गैरबैंक वित्तीय संस्था, बीमा कम्पनी, संगठित संस्था तथा नेपाली नागरिकले खरिद गर्न सक्नेछन् । यो ऋणपत्र धितो राखेर बैंक तथा वित्तीय संस्था र राष्ट्र बैंकबाट ऋण लिन सकिन्छ भने ऋणपत्रको ब्याज अर्ध वार्षिक रुपमा भुक्तानी हुनेछ । ऋणपत्रमा घटीमा ५० हजार र बढीमा कुल निष्कासित रकमको सीमामा नबढाई ५० हजारले भाग गर्दा निःशेष भाग जाने अंकमा लगानी गर्न सकिने राष्ट्र बैंकले जनाएको छ । 

सरकारले आउँदो पुससम्म १ खर्ब १० अर्ब रूपैयाँ आन्तरिक ऋण उठाउने लक्ष्य लिएको छ । चालू आर्थिक वर्षको बजेट वक्तव्यमा सरकारले तय गरेको आन्तरिक ऋण संकलनका लागि नेपाल राष्ट्र बैंकले तालिका सार्वजनिक गरेको छ । जसअनुसार पुससम्ममा १ खर्ब १० अर्ब रूपैयाँ र त्यसपछिका ६ महिनामा १ खर्ब ३० अर्ब गरेर यस वर्ष कुल २ खर्ब ४० अर्ब रूपैयाँ आन्तरिक ऋण उठाउन लागिएको छ । 

सरकारको लक्ष्य अनुसार राष्ट्र बैंकले ट्रेजरी बिल, विकास ऋणपत्र, नागरिक बचतपत्र र वैदेशिक रोजगार बचतपत्रलगायत औजारमार्फत आन्तरिक ऋण उठाउदै आएको छ । गत आर्थिक वर्षमा सरकारले २ खर्ब ५६ अर्ब आन्तरिक ऋण उठाउने लक्ष्य तय गरेकोमा त्यसको ९९ प्रतिशत प्रगति भएको थियो ।

यद्यपि गत वर्ष सरकारले पहिलो त्रैमासमा आन्तरिक ऋण संकलन नगरी दोस्रो त्रैमासबाट मात्र सुरु गरेको थियो । यस वर्ष वित्तीय प्रणालीमा तरलता अधिक रहेको र ब्याजदर पनि कम रहेकाले आर्थिक वर्षको सुरु देखि नै आन्तरिक ऋण उठाउन लागेको हो ।

चालू आर्थिक वर्षमा राष्ट्र बैंकले ५५ अर्बको ट्रेजरी बिल, १ खर्ब ७९ अर्ब विकास ऋणपत्र ५ अर्बको नागरिक बचत पत्र र १ अर्बको वैदेशिक रोजगार बचत पत्र निष्कासन गर्ने भएको छ । चालू आवमा निष्कासन गर्ने आन्तरिक ऋणमा ट्रेजरी बिलको हिस्सा २२.९ प्रतिशत, विकास ऋणपत्रको हिस्सा ७४.६ प्रतिशत, नागरिक बचत पत्रको हिस्सा २.१ प्रतिशत र वैदेशिक रोजगार बचत पत्रको हिस्सा ०.४ प्रतिशत रहेको तालिकामा उल्लेख छ ।