सागरनाथ वन विकास परियोजनाका कर्मचारी आन्दोलनमा

१७ साउन, काठमाडौं । सर्लाहीको सागरनाथ वन विकास परियोजनाका कर्मचारी आन्दोलनमा उत्रिएका छन् । उनीहरुले ११ महिनादेखि तलब नपाएको भन्दै बुधबार माइतीघरमा प्रदर्शन गरेका हुन् । 

उनीहरुलाई झापामा वन क्षेत्रमा कार्यरत कर्मचारीहरुले पनि साथ दिएका छन् । पटकपटक वनमन्त्री फेरिए पनि आफूहरुले तलब पाउन नसकेको र वन क्षेत्रमा थुप्रै काठ कुहिएर खेर गइरहेको भन्दै सरकारको ध्यानाकर्षण गराए ।

प्रदर्शनका क्रममा उनीहरुले नेपालभित्र रहेका काठको सदुपयोग नगरी विदेशबाट अर्बौं रुपैयाँको काठ, फर्निचर खरिद गरेर सरकारले गलत नीति लिएको बताए । विदेशी काठ भित्र्याउन रोकेर स्वदेशको काठ प्रयोगमा ल्याउन उनीहरुले माग गरे । 

साथै, उनीहरुले आफूहरु लामो समयदेखि भोको पेटमा सरकारी काम गर्दै आइरहेको र अब थेग्न नसकिने अवस्था नरहेको बताए । उनीहरुले थाल ठट्टाएर सरकारविरुद्ध चर्को नारा लगाए ।