प्रधानमन्त्री प्रचण्डको परिवारवादले मोरङ माओवादीमा तनाव, ज्वाइँ आचार्यलाई जति पटक सरकार उति पटक मन्त्री

१७ साउन, काठमाडौं । लामो राजनीतिक खिचातानीपछि बनेको कोशी प्रदेश सरकारमा मुख्यमन्त्री उद्धव थापाले शपथ नलिँदै तनाव उत्पन्न भएको छ । मुख्यमन्त्रीको शपथ रोक्नुपर्ने गरी माओवादीमा मन्त्री बन्ने विवाद आएपछि तयारी अवस्थामा रहेको शपथ कार्यक्रम साँझ ५ बजेका लागि सार्नुपरेको छ ।

जति पटक सरकार बनेपनि मन्त्री बन्नै पर्ने र बनाउनै पर्नै नेकपा माओवादीका अध्यक्ष एवं प्रधानमन्त्री पुष्पकमल दाहाल प्रचण्डका ज्वाइँ जीवन आचार्यलाई यसपटक पनि मन्त्री बनाउनुपर्ने केन्द्रको दवावका कारण मोरङ माओवादीमा यति बेला निकै ठूलो दवाव सिर्जना भएको छ । 

यो पटक पनि प्रधानमन्त्री प्रचण्डका ज्वाइँ जीवन आचार्यले सभामुखबाट राजीनामा दिएका बाबुराम गौतमलाई रोकेर आफैं मन्त्री बन्ने अडान राखेपछि माओवादीभित्रको विवादले बिहानको शपथग्रहण रोकिएको हो । 

नवनियुक्त मुख्यमन्त्री उद्धव थापाले बुधबार बिहान प्रदेश प्रमुख पर्शुराम खापुङ्समक्ष पद तथा गोपनीयताको शपथ लिने कार्यक्रम राखिएको थियो । सभामुखबाट राजीनामा दिएका बाबुराम गौतमलाई मन्त्री बनाउने निर्णय माओवादीले गरेको थियो । तर, एक्कासि गौतमको ठाउँमा जीवन शर्मालाई मन्त्री बनाउनुपर्ने दवाव आएपछि विवादले उग्ररुप लिएको छ । 

मुख्यमन्त्री थापाले जनता समाजवादी पार्टी बाहेक गठबन्धन दल कांग्रेस, माओवादी र नेकपा एकीकृत समाजवादी गरी ४ सदस्यीय मन्त्रिमण्डल बनाएर मुख्यमन्त्रीमा शपथ लिने तयारी गरेका थिए । 

सभामुखबाट राजीनामा दिएका बाबुराम गौतमलाई मन्त्री बनाउने निर्णयमा पुगेका बेला प्रधानमन्त्री प्रचण्डका कान्छा ज्वाइँ जीवन आचार्यले अन्तिम समयमा मन्त्रीमा दाबी गरेपछि माओवादीभित्र विवाद बढेको हो ।

उनलाई मन्त्री बिनाउन प्रधानमन्त्री प्रचण्डले दवाव दिएको बताइएको छ । माओवादी संसदीय दलले गौतमलाई आर्थिक मामिला तथा योजना मन्त्रीमा शपथग्रहण गराउने निर्णय गरेको थियो । यो निर्णय भएलगत्तै ज्वाइँ आचार्य माथिको  चाहना भन्दै आफू नै मन्त्री बन्न अगाडि सरेका थिए । यसैले माओवादी प्रदेश कमिटीमा विवाद चुलिएको हो ।