विराटनगरका रोहित चौधरीको हत्यामा २ आरोपी पक्राउ

१७ साउन, काठमाडौं । विराटनगरका २८ वर्षीय रोहित चौधरी हत्यामा संलग्नताको आरोपमा सुनसरी प्रहरीले २ जनालाई पक्राउ गरेको छ । प्रहरीले पक्राउ परेका कसैको पनि परिचय दिएको छ । 

हत्यामा ३ जनाको संलग्नता देखिएको र त्यसमध्ये २ जनालाई पक्राउ गरिएको जिल्ला प्रहरी कार्यालय सुनसरीका प्रहरी प्रमुख प्रहरी उपरीक्षक प्रभु ढकालले जानकारी दिए । अन्यको खोजी भइरहेको उनले बताए ।

पक्राउ परेकालाई पत्रकार सम्मेलन गरी सार्वजनिक गरिने उनले बताए । पक्राउ परेकाहरुबाट चौधरीको हत्यामा प्रयोग भएका पेस्तोल र हतियारसमेत बरामद भएको प्रहरीको दाबी छ । 

यही साउन ५ गते आफ्नो जन्मदिन मनाउने भेडेटार–मुलघाट हुँदै विराटनगर घर फर्कने क्रममा चौधरीलाई धरानको सेउती खोला पुलनजिक ३ जनाको समूहले गोली प्रहार गरी हत्या गरेको थियो ।