सभामुखबाट राजीनामा दिएका बाबुराम बन्ने भए आर्थिक मामिला मन्त्री

१७ साउन, काठमाडौं । मंगलबार नियुक्त भएका मुख्यमन्त्री उद्वव थापाको मन्त्रिमण्डलमा पहिलो चरणमा गठबन्धन दलबाट बन्ने मन्त्रीको नाम टुंगो लागेको छ । यसअघि गठबन्धनका घटक माओवादी केन्द्रले मन्त्रीको नाम टुंगो लगाउन नसक्दा बुधबार बिहान साढे १० बजेका लागि तय भएको शपथ ग्रहण कार्यक्रम स्थगित भएको थियो । 

दिनभर गरेको छलफलमा माओवादी केन्द्रले सभामुखबाट हिजो मात्र राजीनामा गराएका प्रदेश सांसद बाबुराम गौतमलाई पहिलो चरणमा मन्त्री बनाउने टुंगो लगाएको छ । गाैतमविरूद्ध प्रधानमन्त्री प्रचण्डका ज्वाइँ जीवन आचार्य उभिएपछि मन्त्रीमा विवाद बनेकाे थियाे । तर आचार्य पछि हटेका छन् ।

याेसँगै अब मुख्यमन्त्री थापासहित गठबन्धन दलबाट समेत गरी ४ सदस्यीय मन्त्रिमण्डल गठन हुने भएको छ । साथै आजै बेलुका ५ बजे मुख्यमन्त्री र मन्त्रीहरुको शपथ ग्रहण हुनेछ । गौतमलाई आर्थिक मामिला तथा योजनामन्त्री नियुक्त गरिने तयारी भएको छ । 

यस्तै, एकीकृत समाजवादीका कमलप्रसाद जबेगु भौतिक पूर्वाधार र नेपाली कांग्रेसका प्रदीप सुनुवारलाई सामाजिक विकास मन्त्रालयको जिम्मा दिने भएको छ । 

संविधानको १६८ को उपधारा २ अनुसार कांग्रेस, माओवादी केन्द्र, नेकपा एकीकृत समाजवादी र जसपाको समर्थनमा थापा मंगलबार मुख्यमन्त्री नियुक्त भएका थिए । 

थापाले नियुक्त भएकाे ३० दिनभित्र प्रदेशसभाबाट विश्वासकाे मत लिनुपर्ने संवैधानिक व्यवस्था छ । यसअघि मुख्यमन्त्री रहेका एमालेका हिक्मतकुमार कार्की विश्वासकाे मत पाउन नसक्दा गत असारकाे तेस्राे साता पदमुक्त हुन पुगेका थिए ।

यो पनि पढ्नुहोस