सात लाख पार्टी सदस्य रहेको माओवादी केन्द्रकाे दाबी, ‘जनतासँग पार्टी’ अभियान संचालन गरिने

१७ साउन, काठमाडौं । सरकारको नेतृत्व गरिरहेको नेकपा (माओवादी केन्द्र)ले पार्टीमा साढे ७ लाख जना पार्टी सदस्य रहेको दाबी गरेको छ । काठमाडौंमा जारी पार्टीको चौथो पूर्ण बैठकमा प्रधानमन्त्री समेत रहेका पार्टी अध्यक्ष प्रचण्डद्वारा प्रस्तुत राजनीतिक प्रतिवेदनमा यस्तो दाबी गरिएको हो । 

पार्टी पार्टी जस्ता हुन नसकेको भन्दै अध्यक्ष प्रचण्डले पार्टीलाई जनताको घरदैलोमा पुर्याउन तीन महिनासम्म ‘जनतासँग पार्टी अभियान संचालन गर्नुपर्ने प्रस्ताव राखेका छन् । पार्टीमा देखिएका राजनीतिक, वैचारिक तथा सांस्कृतिक चुनौती हल गर्दै जनताको भरोसायोग्य पार्टी निर्माणको आवश्यकता रहेको प्रतिवेदनमा उल्लेख गरेका छन् । वडा स्तरबाट जनताका गुनासो संकलन गर्नुपर्ने उनले प्रस्ताव गरेका छन् ।

साथै पार्टीका नेता तथा कार्यकर्ता सहर, सिंहदरबार, बालुवाटार, प्रदेश सदरमुकाममा केन्द्रित हुने, पद र प्रतिष्ठाका लागि जस्तोसुकै गतिविधि अपनाउने, अपारदर्शी जीवनशैली बढेकाले निर्मम समीक्षा र शद्धिकरण अभियान संचालन गरिने जनाइएको छ ।

पार्टीभित्र समाजवाद उद्देश्य प्राप्तिका लागि व्यापक रुपमा बहस, अन्तरक्रिया र प्रशिक्षण संचालन गरिनुपर्ने औल्याइएको छ । पार्टी र पार्टी नेतृत्वको सरकारले गरेका काम र गणतन्त्रका उपलब्धि प्रचारप्रसार गर्न आइटी तालिम टिम निर्माण गर्नुपर्नेमा जोड दिइएको छ ।