शहरमा सुनको चर्चा, गाउँमा नुनको : ५ केजी नुनलाई ५ हजार !

१७ साउन, मुगु । देशको राजधानी काठमाडौंमा अहिले सुनको चर्चा छ । तर दूरदराजको मुगुमा भने चर्चा नुनको छ । मुगुमा ५ के.जी नुन पाउन एक व्यक्तिले ५ सयदेखि ५ हजार रुपैयाँ सम्म खर्च गर्नु पर्ने अवस्था आएपछि दुर्गममा सिंहदरबार व्यवहारमा पुग्न नसकेको नुनकै अभावले पुष्टि गरेको छ । 

नुन लिन नागरिकताको फोटाकपी बुझाउनु पर्ने 

मुगु जिल्लामा रहेको एक नगरपालिका र ३ गाउँपालिकालाई लक्षित गरी आर्थिक बर्ष २०८९।०८० का लागि ३ हजार ३ सय ९० क्वीन्टल नुन जिल्लामा आए पनि हिजो आज नुनको अभाव हुन थालेको छ । हप्ताको ३ दिन नुन कार्यालय खुल्ला गरी सोरु र खत्याडको प्रशासनको सिफारिसमा स्थानीय नागरिकलाई नागरिकताको फोटोकपी र हातको नङ्गमा रेजा लगाएर प्रति ब्यक्ति ५ के.जी नुन दिने गरिएको छ  ।

अनुदानको सरकारी नुन खान नपाएको ५ ÷ ६ बर्ष भएको र नजिकको स्थानीय बजारमा सरकारी अनुदानको ९ रुपैयाँले पाउने १ केजी नुन  ६० देखि ८० रूपैयाँसम्म रुपैयाँ तिरेर खानु पर्ने वाध्यता रहेको स्थानीयको गुनासो छ । 

३ दिन लगाएर गाउँबाट आउँदा नुन महंगो बन्यो 

मुगमु कामारोङ्ग गाउँपालिका ५ मुगुकी सोनामफुटी लामा २÷३  दिन लगाएर ५ केजी नुन लिन सदरमुकाम गमगढी  आवतजावत गर्दा  गाडी भाडा र खान ५ हजार भन्दा बढी खर्च हुने गरेको दुखेसो पोख्छिन् । सिंहदरबारको अधिकार गाँउ गाँउ आयो भनेर प्रचार गरिएको छ तर उनी भने कहाँ आयो भन्दै गाउँमा आएको सिंहदरबार देखाइदिन आग्रह गर्छिन् । 

५ केजी नुन पशु चौपायालाई खुवाउनु कि आफु खानु ?

नुनको अभावको गुनासो गर्दै छायाँनाथ रारा नगरपालिका वडा नम्बर ८ बस्ने  बिसुकला रावत भन्छिन् ‘ नुन लिन आउँदा १५ ÷ १६ सय रुपैया खर्च हुन्छ, ५ के.जी नुन पाईयो घरमा गाई गोरु भेडा बाख्रा भैसी छन । आफु खानेकी पशु चौपायालाई खुवाउने ५ पोका नुन लिनको लागि पनि नागरिकताको फोटोकपी गर्न १० रुपैया तिरियो हातको नङ्गमा चिन्ह समेत लगाउँदा रहेछन् दुःख बढी नुन कम पाइयो । ’ 

अनुदानको नुन सस्तो हुँदा जिल्ला बाहिर गएको हुन सक्ने आशंका 

सोरु र खत्याड नगरपालिकालाई १ ÷ १ हजार क्विन्टल नुन वितरण गरिसकेको र छायानाथ रारा नगरपालिका र मुगम कामारोङ्ग गाउँपालिकालाई १ हजार ३ सय ९० क्वीन्टल नुन वितरण भइसकेको मुगुका प्रमुख जिल्ला अधिकारी मोहनबहादुर थापा बताउँछन् । अनुदानमा आएको नुन प्रति केजी ९ रुपैयाँ  पर्दा सस्तो भएको हुँदा सबैको भीड सदरमुकाम हुने र बाहिरी जिल्ला बाँके र सुर्खेत सम्म जाने गुनासो आएपछि प्रहरी मार्फत चेक जाँच र निगरानी समेत बढाएको प्रजिअ थापाले बताए । तर मुगुमा नुनको अभाव भने नरहेको पनि उनको भनाइ थियो । 

यता जिल्ला साल्ट ट्रेडिङ्ग कर्पोरेशन लिमिटेडले मुगुमा अहिले ३ सय ५० क्वीन्टल नुन मौज्दात रहेको बताए ।  मुगु जिल्लामा नुनको अभाव प्रत्येक बर्ष हुने गरेको छ । जिल्लामा रहेका राजनीतिक दल ,जनप्रतिनिधि र जिल्लामा रहेका सरोकारवालाहरुको केन्द्रमा पहुँच नहुँदा हरेक बर्ष मुगु लगाएत कर्णालीका सबै जिल्लामा नुन अभाव हुने गरेको छ ।