माइतीबाट घर फर्किएकै दिन मृत्यु भएकी संजिता चाैधरीको हत्या भएको आंशका

१७ साउन, काठमाडौं । कैलालीको धनगढीमा एक महिला माइतीबाट घर पुगेकी दिन मृत्यु भएको घटनालाई शंकास्पद रुपमा हेरिएको छ ।

धनगढी उपमहानगरपालका–१७ धुर्जुना माइती भएकी २४ वर्षीया संजीता चौधरी भजनी नगरपालिका–५ लालबोझीस्थित आफ्नै घरमा मंगलबार राति मृत अवस्थामा फेला परेकी थिइन् । 

उनी मंगलबार दिउँसो माइती घरबाट धनगढी बजारबाट १२ बजे बस चढेर २ बजे घर पुगेकी थिइन् ।प्रेम विवाह गरेकी उनी श्रीमान सुवेत यादवको भौतिक र मानसिक यातनाबाट पीडित थिइन् । सोही दिन सुवेत भारत जान्छु भन्दै घरबाट निस्किएका र सोही दिन संजिताले घरमा झुण्डिएर आत्महत्या गरेको दाबी घर पक्षले गरेको छ । 

तर माइती पक्षले संजीताको आत्महत्या नभई हत्या भएको दाबी गरेको छ । घटनाको छानबिन गरी दोषीलाई कारवाहीको दायरामा ल्याउन माग गरेको छ । संजिताको मोवाइल स्वीच्ड अफ गरिएको अवस्थामा श्रीमान सुवेतसँग फेला परेको प्रहरीको दाबी छ । सुवेतलाई नियन्त्रण लिन माइती पक्षले दबाब दिइरहेको छ । 

माइती पक्षकाे उपस्थितिबिना नै मृतकको टीकापुर अस्पतालमा पोष्टमार्टम समेत गरिएकाे र यसबाट संजिताकाे आत्महत्या नभएर हत्या नै भएको पुष्टि गरेकाे माइती पक्षकाे दाबी छ ।

घटनाबारे जाहेरी भने नपरेको प्रहरीको भनाइ छ । घटनाबारे आवश्यक अनुसन्धान भइरहेको प्रहरीले जनाएको छ ।