नवनियुक्त मुख्यमन्त्री थापाले लिए शपथ, ४ सदस्यीय मन्त्रिमण्डल गठन

१७ साउन, काठमाडौं । कोशी प्रदेशका नवनियुक्त मुख्यमन्त्री उद्धव थापाले पद तथा गोपनीयताको शपथ लिएका छन् । बुधबार साँझ प्रदेश प्रमुखको कार्यालयमा प्रदेश प्रमुख परशुराम खापुङबाट शपथ लिएका हुन् ।

प्रदेश प्रमुख खापुङले थापालाई संविधानको धारा १६८ को २ बमोजिम मंगलबार मुख्यमन्त्री नियुक्त गरेका थिए । थापा महिना दिनमै दोस्रोपटक मुख्यमन्त्री बनेका हुन् । यसअघि गएको असार २१ मा मुख्यमन्त्री बनेका थापा साउन ११ मा सर्वोच्च अदालतबाट भएको परमादेशका कारण पदमुक्त हुन पुगेका थिए । त्यसपछि खापुङबाट भएको आह्वानमा कांग्रेस, माओवादी कैन्द्र, एकीकृत समाजवादी र जसपाका ४७ सांसदको समर्थनमा पुनः मुख्यमन्त्री बनेका हुन् । 

आफूले शपथ लिएसँगै मुख्यमन्त्री थापाले सानो मन्त्रिपरिषद् समेत गठन गरेका छन् । निर्वतमान सभामुख माओवादी केन्द्रका नेता बाबुराम गौतम आर्थिक मामिला तथा योजनामन्त्रीमा नियुक्त भएका छन् । 

उनले कांग्रेसका प्रदीपकुमार सुनुवार खानेपानी, सिँचाइ तथा ऊर्जामन्त्री, एकीकृत समाजवादीका कमलप्रसाद जबेगु सडक पूर्वाधार तथा भौतिक विकासमन्त्री नियुक्त गरेका छन् । मन्त्रीहरुले पनि शपथ लिएका छन् । माओवादी केन्द्रले मन्त्री बन्ने पात्रको नाम टुंगो लगाउन बुधबार बिहान साढे १० बजेका लागि तोकिएको शपथ बेलुका ५ बजेका लागि सारिएको थियो ।

शपथ ग्रहण कार्यक्रममा प्रमुख प्रतिपक्षी नेकपा (एमाले)लाई भने बोलाइएन । यसअघि एमाले कोशी प्रदेशको संसदीय दलका नेता एवं निवर्तमान मुख्यमन्त्री हिक्मतकुमार कार्कीले सर्वोच्चमा दायर गराएको मुद्दामा थापा पदमुक्त भएका थिए ।