सहकारी पीडितको आन्दोलनमा कलाकारहरुको ऐक्यवद्धता

१८ साउन, काठमाडौं । सहकारी पीडितहरुको आन्दोलनमा कलाकारहरुले ऐक्यवद्धता जनाएका छन् । चलचित्रकर्मी, गायक तथा वरिष्ठ कलाकारहरु माइतीघरमण्डलामा पुगेर आन्दोलनमा ऐक्यवद्धता जनाएका हुन् ।

समस्या परेका आर्थिक संकट टार्ने उद्देश्यले सर्वसाधारणले आफूले मेहनत गरेर सहकारीमा बचत गरेका बचतरकम सहकारी संचालकले हिनामिना गरेपछि बचत रकम फिर्ताको माग गर्दै ६१ दिनदेखि मण्डलामा पीडितहरु धर्ना र आन्दोनलनमा छन् । 

आन्दोलनपछि पनि सरकारले समस्या समाधान गर्ने र दोषीलाई कारवाही गर्न बेवास्ता गरेपछि पीडितहरु आक्रोशित बनेका छन् । आन्दोलनमा विभिन्न क्षेत्र र अभियानकर्मीहरुबाट ऐक्यवद्धता जनाउने क्रम बढ्दै गइरहेको छ । 

कला वरिष्ठ कलाकारहरु मोहन निरौला, भुवन चन्द, बसुन्धरा भुसाल, नबिन सुब्बा लगायतले संस्थागत रुपमा आन्दोलनमा ऐक्यवद्धता जनाएका छन् । पीडितलाई न्याय दिन र दोषीलाई कानूनको दायरामा तत्काल ल्याउन उनीहरुले सरकारसँग जोडदार माग गरे । आफूहरुको आवाज सुनुवाइ नभए कडा आन्दोलनमा उत्रने चेतावनी समेत दिए ।

देशभरका दर्जनौं सहकारीबाट ५० अर्ब रुपैयाँभन्दा बढी बचत रकम हिनामिना भएको अनुमान गरिएको छ । देशभरका पीडितहरु अहिले पनि मण्डलामा २४ सै घण्टा धर्नामा बसिरहेका छन् ।