संवैधानिक परिषदको बैठक आज, प्रधानन्यायाधीश सिफारिस हुनेमा अझै आशंका

१८ साउन, काठमाडौं । प्रधानन्यायाधीश नियुक्तिको सिफारिसका लागि संवैधानिक परिषदको बैठक आज बस्दै छ । बैठक प्रधानमन्त्री कार्यालय सिंहदरबारमा साँझ ५ बजे बस्नेछ । तर, परिषदमा विवाद रहेकाले आज प्रधानन्यायाधीश सिफारिस हुने कुरा अझै अनिश्चित छ । विवाद नआएको भए मंगलबार नै सिफारिस हुने थियो । 

हालका प्रधानन्यायाधीश हरिकृष्ण कार्की यही साउन १९ गते अनिवार्य अवकाशमा जाने भएकाले नयाँ प्रधानन्यायाधीश सिफारिस गर्न लागिएको हो । वरिष्ठताको आधारमा न्यायाधीश विश्वम्भरप्रसाद श्रेष्ठ भावी प्रधानन्यायाधीशको रोलक्रममा पहिलो नम्बरमा छन् । संविधानको धारा २८४ को उपधारा ३ को व्यवस्थाअनुसार प्रधानन्यायाधीशको अवकास हुनुभन्दा एक महिना अगाडि नै नयाँ नियुक्ति सिफारिस गर्नुपर्ने संवैधानिक व्यवस्था छ ।

उक्त व्यवस्था अनुसार १९ असारमै प्रस्तावित प्रधानन्यायाधीशको नाम सिफारिस हुनुपर्नेमा बैठक बस्न ढिलाइ हुँदा सिफारिस हुन सकेको छैन ।  गत मंगलबार पनि संवैधानिक परिषद बैठक बसेको थियो । तर नियुक्ति सिफारिस हुन सकेको थिएन । अस्तिको बैठकमा रोलक्रम अनुसार सर्वोच्च अदालतको प्रधानन्यायाधीशमा विश्वम्भरप्रसाद श्रेष्ठ नै नियुक्तिका लागि सिफारिस हुने भएपछि नेकपा एमालेका अध्यक्ष केपी शर्मा ओलीले निर्वाचन आयोग, वित्त सेवा आयोग र महालेखा परीक्षकको रिक्त पदमध्ये दुईमा एमालेको दावी राख्दै एकैपट सिफारिस हुनुपर्ने प्रस्ताव गरेका थिए ।  

यसैले गर्दा मंगलबारको संवैधानिक परिषदको बैठकमा रोलक्रम अनुसार प्रधानन्यायाधीश सिफारिस हुने भएपनि हुन सकेन । ओलीले प्रमुख प्रतिपक्षी दलको हैसियतले पनि महालेखा परीक्षक, निर्वाचन आयोग र वित्त सेवा आयोगमध्ये दुई निकायको सदस्यका लागि एमालेले दिएका नाम सिफारिस हुनुपर्ने माग राखेका थिए ।  

आज पनि यही विषयमा ओलीले दवाव दिनेछन् । विपक्षी दल नेताका रुपमा बैठकमा उपस्थित भएका अध्यक्ष ओलीले अचानक नयाँ प्रस्ताव राखेपछि प्रधानन्यायाधीशको नाम सिफारिस गर्न भनेर बसेको बैठकका अन्य सदस्यहरू अचम्ममा परेका थिए । बैठक सुरु भएपछि ओलीले ओलीले ‘आज प्रधानन्यायाधीशको मात्र सिफारिस गरेर हुँदैन, अन्य संवैधानिक आयोगका रिक्त पदमा पनि सिफारिस गरौं, प्रधानन्यायाधीशको कुरा त सक्की नै गयो । यसमा को कस्को भन्ने कुरा आएन, तर, अरूमा प्रमुख प्रतिपक्ष दल भएकाले तीनमध्ये दुईमा एमालेले नाम दिन्छ, उसले दिएका नामको पनि आजै सिफरिस गरौँ’ भनेपछि बैठक अन्यत्रै मोडिएको थियो ।