कुवेतमा नेपाली श्रमिकको संख्या ८५ हजार नाघेको प्रस्तावित राजदूत लम्सालको दावी

१८ साउन, काठमाडौं । कुवेतका लागि प्रस्तावित राजदूत घनश्याम लम्सालले संघीय संसदको संसदीय सुनुवाइ समितिमा कुवेतमा रहेका नेपालीबारे जानकारी गराएका छन् । उनले कुवेतमा ८५ हजारमाथि नेपालीहरू रहेको अनुमान गर्न सकिने बताएका छन् । 

हाल ५७ जना नेपाली कुवेतका विभिन्न जेलमा कैदी जीवन बिताइरहेको जानकारी उनले दिएका छन् । परराष्ट्र मन्त्रालयका सहसचिव समेत रहेका लम्सालले कुवेतको जेलमा कैदी जीवन बिताइरहेका मध्ये एक पुरुष र एक महिलालाई जन्म कैदको सजाय सुनाइएको बताए ।

संघीय संसदको संसदीय सुनुवाइ समितिको बिहीबारको बैठकमा सांसदहरूले सोधेका प्रश्नको जवाफमा प्रस्तावित राजदूत लम्सालले कुवेतमा नेपाली श्रमिकको संख्या ८५ हजार पुगेको आंकलन रहेको बताए । कुवेतका जेलमा ५७ जना नेपाली अहिले जेलमा रहेका छन् । उनले ३६ जनालाई दूतावासले भेटिसकेको र  धेरैजसो ड्रगको मुद्दामा जेलमा परेका उनले बताए । जेलमा रहेका मध्ये १ महिला र १ पुरुष लाइफ सेन्टेन्स अर्थात जन्मकैद पाएको बताए । 

आफू राजदूत बनेर गएपछि कुवेतको जेलमा रहेका नेपालीको कैद घटाउने आफ्नो पहल हुने लम्सालले प्रतिबद्धता जनाए । कुवेतमा महिलालाई कामदारका रुपमा जान प्रतिबन्ध लगाएको छ । तर, अवैध प्रक्रिया र बाटोबाट हजारौं महिला पुगेको बताइएको छ ।