ललितानिवास जग्गा प्रकरणमा पक्राउ परेकामध्ये २ जना रिहा

१८ साउन, काठमाडौं । प्रधानमन्त्रीको सरकारी निवास बालुवाटारस्थित सरकारी जग्गा ललिता निवास जग्गा प्रकरणमा पक्राउ परेकामध्ये २ जनालाई हाजिरजमानीमा रिहा गरिएको छ । 

प्रहरीको केन्द्रीय अनुसन्धान ब्यूरो (सीआईबी)ले पक्राउ गरी अनुसन्धानका लागि न्यायिक हिरासतमा राखिएका समरजंग कम्पनीका तत्कालीन प्रमुख रमेशकुमार पोखरेल र सिद्धिका खेतानलाई रिहा गरेको हो । 

पोखरेलको स्वास्थ्यको कारण देखाउँदै जिल्ला अदालत काठमाडौंले हाजिर जमानीमा छाड्न आदेश दिएपछि रिहा गरेको सीआईबी प्रवक्ता दिनेश आचार्यले जानकारी दिएका छन् । 

खेतानलाई भने आफ्नो नाममा ल्याएको निवासको ७ आना जग्गा फिर्ता गर्न सहमति जनाएपछि छाडिएको बताइएको छ । कीर्ते कागजातका आधारमा सरकारी जग्गा आफ्नो नाममा ल्याएकाे र त्यसक्रममा घुसरिसवत लिएकाे आरोपमा व्यापारी, सम्बन्धित क्षेत्रका मालपाेतका तत्कालीन कर्मचारी लगायत थप २० जना हिरासतमा नै छन् । 

उनीहरूविरूद्ध कीर्ते, संगठित अपराध कसुरमा अनुसन्धान भइरहेकाे सीआईबीले जनाएकाे छ ।