२६ वर्षको करिअरमा मैले कुनै महिलामाथि दुर्व्यवहार गरेको छैनः प्रस्तावित राजदूत क्षेत्री

१८ साउन, काठमाडौं । युएईका लागि प्रस्तावित नेपाली राजदूत तेजबहादुर क्षेत्रीले कार्य क्षेत्र वा अन्य कुनै पनि ठाउँमा आफूले महिलामाथि दुर्व्यवहार नगरेको बताएका छन् । उनले आफूमाथि महिलामाथि दुर्व्यवहार गरेको र कार्यक्षमताको विषयलाई लिएर आएका उजुरीले परराष्ट्र मन्त्रालयकै बेइज्जत गरेको दावी समेत गरेका छन् । 

संसदीय सुनुवाइ समितिमा सुनुवाइको क्रममा सांसदहरूले सोधेका प्रश्नको जवाफमा प्रस्तावित राजदूत क्षेत्रीले महिलालाई आफूले सम्मान गर्ने, देवी मान्ने र दुर्व्यवहार गरेको भनेर कहिले पनि गुनासो वा उजुरी मन्त्रालयमा नपरेको बताए । संसदीय सुनुवाइ समितिको बिहीबारको बैठकमा यूएईका लागि प्रस्तावित राजदूत क्षेत्रीलाई मन्त्रालयका कर्मचारीको तर्फबाट दर्ता गरिएको उजुरीका आधारमा सांसदहरूले प्रश्न गरेका थिए ।

सांसद ईश्वरी घर्तीमगरले क्षेत्रीविरुद्ध पाँच वटा गम्भीर प्रकृतिका उजुरी समितिमा परेको बताइन् । उनले राजदूतलाई आवश्यक पर्ने अंग्रेजी भाषामा दक्ष नभएको, पटक पटक महिलामाथि दुर्व्यवहार लगायत उजुरी रहेको भन्दै उनले प्रश्न गरेकी थिइन् । यसको जवाफ दिँदै क्षेत्रीले आफूले कहिल्यै पनि दुर्व्यवहार नगरेको बताए । 

उनले आफूले बीएड र बीएसम्म अध्ययन गरेको, २६ वर्ष परराष्ट्र सेवामा बिताएर बेलायतमा कार्यवाहक राजदूत भई काम गरेको बताउँदै अंग्रेजीमा दक्ष रहेको प्रस्ट पारे । उनले महिलाहरूलाई जहिले पनि सम्मान गर्ने र देवी मान्ने गरेको दोहोर्याए । 

उनले भने,‘कतिपयलाई काम धेरै लगायो भने चित्त बुझ्दैन त्यसैले झुठो आरोप लगाइए । मलाई दुख लागेको छ । महिलाप्रति सम्मान गर्छु, देवी मान्छु । २६ वर्षको करिअरमा मैले यस्तो सुनेको छैन । यो मेरो प्रतिष्ठालाई ड्यामेज र डिफेम, बेइज्जत गर्ने कुरा आयो । यस्ता कुराले म निरूत्साहित हुन्न । यो मेरो मात्र बेइज्जत होइन, परराष्ट्र मन्त्रालयकै बेइज्जत हो ।’

राजदूत भएर यूएई गएपछि नेपालको उत्पादनका लागि बजार खोज्ने क्षेत्रीको भनाइ थियो । यूएईमा रहेका नेपाली श्रमिकको पक्षमा आफूले काम गर्ने उनको प्रतिबद्धता थियो । संसदीय सुनुवाइ समितिले प्रस्तावित राजदूतहरुको सुनुवाइ गरिरहेको छ  ।