प्रस्तावित ६ जना राजदूत सर्वसम्मत अनुमोदित

१८ साउन, काठमाडौं । संसदीय सुनुवाइ समितिबाट ६ जनाको नाम राजदूतमा सर्वसम्मत अनुमोदन भएको छ । सरकारबाट विभिन्न मुलुकका लागि सिफारिस भएर आएका राजदूतहरुको नाम सुनुवाइ समितिको बिहीबार बसेकाे बैठकले सुनुवाइपछि सर्वसम्मत अनुमोदन गरेको हो । ३ जनाको बुधबार र बाँकी ३ जनाको संसदीय सुनुवाइ आज सकिएको हो । 

न्युयोर्कस्थित संयुक्त राष्ट्रसंघको नेपाल नियोगमा आवासीय प्रतिनिधिमा लोकबहादुर थापा, जेनेभास्थित संयुक्त राष्ट्रसंघीय नियोगका आवासीय प्रतिनिधि रामप्रसाद सुवेदी, संयुक्त अरब इमिरेट्सको राजदूतमा तेजबहादुर क्षेत्री, कुवेतको राजदूतमा घनश्याम लम्साल, थाइल्यान्डका लागि धनबहादुर ओली र फ्रान्सको राजदूतमा सुधीर भट्टराईको नाम सर्वसम्मत अनुमोदन भएको समितिका सभापति ज्ञानेन्द्रबहादुर कार्कीले जानकारी दिए ।

सुनुवाइका क्रममा उनीहरुले सांसदहरुबाट कार्य क्षमता, कार्य योजना, आचरण, नैतिकतासम्बन्धी थुप्रै प्रश्नको सामना गरेका थिए ।

मन्त्रिपरिषदको निर्णयमा उनीहरुलाई राष्ट्रपतिबाट नियुक्ति गरिनेछ ।