सरकारले त्रिभुवन विमानस्थलबाट बरामद भएको सुन छानबिनका लागि उच्चस्तरीय समिति नबनाउने

१८ साउन, काठमाडौं । सरकारले त्रिभुवन अन्तर्राष्ट्रिय विमानस्थलबाट बरामद भएको एक क्वीटल सुनको छानविनका लागि उच्चस्तरीय समिति नबनाउने निर्णय गरेको छ । मन्त्रिपरिषदको बैठकले यस्तो निर्णय गरेको हो । तस्करी प्रकरणमा राजस्व विभागले अनुसन्धान गरिरहेकाले उच्चस्तरीय छानबिन समिति आवश्यक नरहेको सरकारको भनाइ छ । 

मन्त्रिपरिषद्का निर्णय सार्वजनिक गर्न बिहीबार सिंहदरबारमा आयोजित पत्रकार सम्मेलनमा सरकारकी प्रवक्ता रेखा शर्माले करिब एक सय केजी सुन पक्राउ गरिएको विषयमा प्रधानमन्त्री तथा मन्त्रिपरिषद् कार्यालय मातहतको राजस्व अनुसन्धान विभागबाट प्रभावकारी छानबिन भइरहेकाले उच्चस्तरीय समिति आवश्यक नरहेको जानकारी गराइन् ।   
 
शर्माले करिब एक सय केजी सुन पक्राउ गरिएको विषयमा राजस्व अनुसन्धान विभागबाट प्रभावकारी छानबिन भइरहेकाले उच्चस्तरीय समिति आवश्यक नरहेको बताइन् । उनले सरकार यस घटनाको जरासम्म पुग्न लागेकाले उच्चस्तरीय छानबिनको आवश्यकता सरकारले नदेखेको बताइन् । प्रवक्ता शर्माले सरकारकै अग्रसरतामा सुन पक्राउ गरिएको भन्दै विभागले गरिरहेको अनुन्धानलाई निष्कर्षमा पुग्न दिन आग्रह गरिन् ।

राज्यको एउटा निकायले छानबिन गरिरहेकै अवस्थामा अर्को समिति बनाउँदा छानबिन प्रभावित हुन सक्ने उनको भनाइ छ । त्यस्तै, प्रवक्ता शर्माले एमालेले संसद्मा गरिरहेको अवरोध हटाउने विषयमासमेत कुराकानी भइरहेको उल्लेख गर्दै छिट्टै अवरोध हट्ने बताइन् । उनले सरकार यस घटनाको जरासम्म पुग्न लागेकाले उच्चस्तरीय छानबिनको आवश्यकता सरकारले नदेखेको दावी  गरिन् ।