प्रधानन्यायाधीशमा विश्वम्भरप्रसाद श्रेष्ठ सिफारिस, संवैधानिक निकायका रिक्त पदमा १५ दिने सूचना निकालिने

१८ साउन, काठमाडौं । प्रधानन्यायाधीशमा सर्वोच्च अदालतका वरिष्ठतम् न्यायाधीश विश्वम्भरप्रसाद श्रेष्ठ सिफारिस भएका छन् । संवैधानिक परिषद्को बिहीबारको बैठकले श्रेष्ठलाई प्रधानन्यायाधीशमा सिफारिस गरेको हो ।

सर्वोच्च अदालतका वरिष्ठतम् न्यायाधीश श्रेष्ठलाई वरिष्ठताका आधारमा प्रधानन्यायाधीशमा सिफारिस गरिएको हो । परिषद्बाट सिफारिस भएका श्रेष्ठको संसदीय सुनुवाइ भई अनुमोदन भएपछि राष्ट्रपतिले नियुक्त गर्नेछन् । 

वर्तमान प्रधानन्यायाधीश हरिकृष्ण कार्कीको कार्यकाल यही साउन २० गते सकिँदै छ । संवैधानिक निकायमा रिक्त रहेका पदका लागि १५ दिने सूचना निकाल्ने निर्णय पनि भएको छ । संवैधानिक परिषद्ले संवैधानिक निकायमा रिक्त रहेका विभिन्न पदमा नियुक्तिको प्रक्रिया अगाडि बढाउन यस्तो निर्णय गरेको हो । 

परिषद् सदस्य तथा राष्ट्रिय सभा अध्यक्ष गणेशप्रसाद तिमिल्सिनाका अनुसार महालेखा परीक्षक, निर्वाचन आयुक्त, प्राकृतिक स्रोत तथा वित्त आयोगको सदस्य, मुस्लिम आयोगको सदस्यका लागि प्रक्रिया अघि बढाउन १५ दिनको सूचना निकालेर इच्छुकहरूको आवेदन माग्नुपर्ने व्यवस्था छ । त्यसका लागि सूचना निकाल्ने निर्णय भएको हो ।