माछापुच्छ्रे बैंक आधारभूत रुपमा यसरी भयो बलियो, आकर्षक वित्तीय विवरणले लाभांश क्षमतामा छलाङ्ग

१९ साउन, काठमाडौं । माछापुच्छ्रे बैंकले आकर्षक वित्तीय विवरण प्रस्तुत गरेको छ । कम्पनीले प्रकाशन गरेको आर्थिक वर्ष ०७९/८० को चौथो त्रैमासको वित्तीय विवरण अनुसार कम्पनीका धेरै सूचकहरूमा उत्साहजनक प्रगति देखिएको छ ।

गत आर्थिक वर्षको चौथो त्रैमाससम्म आउँदा कम्पनीको लाभांश क्षमता निकै बलियो बनेको छ । अघिल्लो आर्थिक वर्षको चौथो त्रैमासको तुलनामा लाभांश क्षमता करिब ३ गुणाले वृद्धि भएको छ । खुद मुनाफा देखि प्रतिशेयर आम्दानीसम्ममा बैंकले चमत्कारिक बृद्धि हासिल गर्न सफल भएको हो ।

संचित मुनाफा करिब १६३ प्रतिशतले बृद्धि गर्न सफल भएको बैंकको जगेडा कोष रकम पनि २४ प्रतिशतले वृद्धि भएको छ । फलस्वरुप बैंकको प्रतिशेयर किताबी मूल्य करिब १६० रूपैयाँ पुगेको छ । यसरी हेर्दा बैंक आधारभूत रुपमा पनि बलियो हुन थालेको छ । बैंकको सिडी रेसियो ८० दशमलव ६४ प्रतिशत मात्र रहेको छ । यसको अर्थ बैंकसँग कर्जा प्रवाहको लागि राम्रो तरलता रहेको बुझ्न सकिन्छ । 

यस बैंक संचालक समितिको अध्यक्षमा गैर आवासीय नेपाली एशोसियशनका संस्थापक अध्यक्ष डा. उपेन्द्र महतो छन् । बैंक संचालक समितिका अन्य सदस्यमा रोशन के.सी., मुकुन्द महत, जय मुकुन्द खनाल, विश्व प्रकाश गौतम, हरिभक्त सिग्देल र बन्दना कार्की रहेका छन् । 

त्यस्तै बैंकको उच्च व्यवस्थापनमा सीईओ सन्तोष कोइराला देखि डेपुटी सीईओमा सर्जुकुमार थापा र विश्वम्भर न्यौपाने रहेका छन् । बैंक अफ काठमाण्डूबाट आफ्नो करियर सुरु गरेका सीईओ कोइराला बैंकिङ क्षेत्रका विभिन्न प्रमुख पदहरुमा २१ वर्षभन्दा बढी सफल अनुभव भएका एक योग्य, युवा र परिणाममुखी बैंकर हुन् ।  

कस्तो आयो आर्थिक वर्ष ०७९/८० को चौथो त्रैमासको वित्तीय प्रतिवेदनः

खुद मुनाफाः
गत आर्थिक वर्षको चौथो त्रैमास अर्थात् १२ महिनाको अवधिमा बैंकले १ अर्ब ८५ करोड बराबर खुद मुनाफा गरेकोमा अघिल्लो आर्थिक वर्षको चौथो त्रैमाससम्ममा १ अर्ब ६८ करोड बराबर खुद मुनाफा गरेको थियो । यसरी खुद मुनाफामा ९ दशमलव ७५ प्रतिशतको वृद्धि भएको छ ।

खुद ब्याज आम्दानी र संचालन मुनाफाः

अघिल्लो आर्थिक वर्षको चौथो त्रैमासमा कम्पनीले ४ अर्ब ८७ करोड बराबर खुद ब्याज आम्दानी गरेकोमा गत आर्थिक वर्षको चौथो त्रैमाससम्म कम्पनीले ५ अर्ब ३८ करोड खुद ब्याज आम्दानी गरेको छ । यसरी खुद ब्याज आम्दानीमा १० दशमलव ४३ प्रतिशतको वृद्धि भएको छ । त्यस्तै, संचालन मुनाफा ९ दशमलव ९१ प्रतिशतले वृद्धि हुँदै २ अर्ब ६९ करोड पुगेको छ । 
प्रतिशेयर आम्दानीःकम्पनीको वार्षिक प्रतिशेयर आम्दानी १८ रूपैयाँ ०५ पैसा हुन आउँछ । एक वर्ष अघि प्रतिशेयर आम्दानी १६ रूपैयाँ ४४ पैसा थियो । समीक्षा अवधिमा प्रतिशेयर आम्दानी ९ दशमलव ७९ प्रतिशतले वृद्धि भएको छ ।
वितरणयोग्य मुनाफाःकम्पनीको वितरणयोग्य मुनाफा १ अर्ब ५६ करोड रहेको छ । अघिल्लो आर्थिक वर्षमा वितरणयोग्य मुनाफा जम्मा ५९ करोड ७२ लाख थियो । समीक्षा अवधिमा वितरणयोग्य मुनाफा १६२ दशमलव ६६ प्रतिशतले वृद्धि भएको छ । कम्पनीको प्रतिशेयर वितरणयोग्य मुनाफा १५ रूपैयाँ २९ पैसा रहेको छ । अघिल्लो आर्थिक वर्ष प्रतिशेयर वितरणयोग्य मुनाफा ५ रूपैयाँ ८२ पैसा थियो ।

निक्षेप, कर्जाः

कम्पनीले गत आर्थिक वर्षको चौथो त्रैमाससम्म १ खर्ब ५४ अर्ब निक्षेप संकलन गरी १ खर्ब २६ अर्ब कर्जा प्रवाह गरेको छ । आर्थिक वर्ष ७८/७९ को असार मसान्त र अहिलेको तथ्याङ्कलाई दाँजेर हेर्दा कम्पनीको निक्षेप संकलन ६ दशमलव ३१ प्रतिशतले वृद्धि भएको छ भने कर्जा प्रवाह १ दशमलव ६४ प्रतिशतले घटेको छ ।

जगेडा कोष, संचित मुनाफाः

जगेडा कोष २४ दशमलव ०२ प्रतिशतले बढेर ४ अर्ब ४६ करोड रूपैयाँ रहेको छ भने संचित मुनाफा १६२ दशमलव ६६ प्रतिशतले वृद्धि भएर १ अर्ब ५६ करोड रूपैयाँ पुगेको छ ।

किताबी मूल्यः

कम्पनीको किताबी मूल्य ( प्रतिशेयर नेट्वर्थ) १५९ रूपैयाँ ०१ पैसा आउँछ ।

निष्क्रिय कर्जाः

कम्पनीको खराब कर्जा २ दशमलव १२ प्रतिशत रहेको छ । अघिल्लो आर्थिक वर्षको चौथो त्रैमासमा खराब कर्जा १ दशमलव ०४ प्रतिशत थियो । यसरी खराब कर्जा भने दोब्बरले बृद्धि हुन पुगेको छ । बैंक व्यवस्थापनलाई खराब कर्जा घटाउनु पर्ने चुनौति खडा भएको छ । आर्थिक मन्दीको प्रभाव बैंकलाई परेको भान यो तथ्याङकले देखाउँछ ।

आधार ब्याजदर, स्प्रेडदरः
बैंकको आधार ब्याजदर केही बढ्दै १० दशमलव ७४ प्रतिशत पुगेको छ । स्प्रेडदर ३ दशमलव ९५ प्रतिशत छ । अघिल्लो आर्थिक वर्ष सोही अवधिमा स्प्रेडदर ४ दशमलव ३३ प्रतिशत थियो ।
ठुला शेयरधनीः
आर्थिक वर्ष ७८/७९ को वार्षिक प्रतिवेदन अनुसार कम्पनीमा ठुला शेयरधनीमा सुरेन्द्र महतो रहेका छन् । बैंकमा महतोको १ अर्ब १३ करोड रुपैयाँ बराबरको शेयर स्वामित्व रहेको छ ।

लाभांश इतिहासः
कम्पनीले आर्थिक वर्ष २०७७/७८ मा १३ दशमलव ३ प्रतिशत बोनस र ० दशमलव ७ प्रतिशत नगद लाभांश दिएको थियो । बिगत ५ वर्षमा कम्पनीले जम्मा ३४ दशमलव ३३ प्रतिशत बोनस, ३१ दशमलव ०७ प्रतिशत नगद लाभांश गरि ६५ दशमलव ४० प्रतिशत लाभांश दिएको छ । ५ वर्षको औसत बोनस शेयर ६ दशमलव ८७ प्रतिशत, नगद लाभांश ६ दशमलव २१ प्रतिशत गरि कुल औसत लाभांश १३ दशमलव ०८ प्रतिशत रहेको छ ।