दोलखा पहिरो अपडेट : घाइते दुई जनालाई काठमाडौं ल्याइयाे

१९ साउन, दोलखा । दोलखाको गौरीशंकर गाउँपालिका–७ टोपाटारमा पहिरोमा पुरिएर घाइते भएका दुई जनालाई उपचारको लागि हेलिकोप्टरबाट काठमाडौं ल्याइएकाे छ ।

घाइते ४० वर्षीय यज्ञबहादुर थामी र उनकी ३९ वर्षीय श्रीमती धनमाया थामीलाई उपचारको लागि शुक्रबार दिउँसो काठमाडौं ल्याइएकाे हाे । उनीहरूकी बुहारी २२ वर्षीय सीता थामीको दोलखाको सिँगटी अस्पतालमा उपचार भइरहेको छ ।  

सो पहिरोमा परि एक नाबालक प्रिन्स थामीको ज्यान गएको छ  भने स्थानीय ४९ वर्षीय हरिलाल श्रेष्ठ, ६० वर्षीय कृष्णबहादुर मगर र ५० वर्षीय देवीमाया मगर बेपत्ता छन् ।  गए राति गौरीशंकर गाउँपालिका–८ सल्लेमा गएको पहिरोले वडा नं ७ को टोपाटारमा घर पुरेको थियो । पहिरोले घर पुर्दा सो घटना भएको हो । पहिरोमा हराएकोको खोजी जारी रहेको दोलखा प्रहरीले जनाएको छ । 

पहिरोका कारण दुईवटा वडाका आठ घरमा क्षति पुगेको छ भने ३२ बढी घर जोखिममा परेको छन् । जोखिममा रहेका घर परिवारलाई सुरक्षित स्थानमा सारिएको छ ।