बजारीकरण गर्न सकियो भने नेपाली हाते कागजको अन्तर्राष्ट्रिय बजारकाे सम्भावना छ : सचिव मरासिनी

१९ साउन, काठमाडौं । उद्योग वाणिज्य तथा आपूर्ति मन्त्रालयका सचिव मधुकुमार मरासिनीले बजारीकरण गर्न सकियो भने नेपाली हाते कागजको अन्तर्राष्ट्रिय बजारको सम्भावना रहेको बताएका छन् । 

शुक्रबार नेपाली हाते कागजको विशेष मेला उद्‍घाटन समारोहलाई सम्बोधन गर्दै सचिव मरासिनीले सरकारको तर्फबाट सरकारको नीतिमा यसलाई सम्भावना भएको उत्पादनको रुपमा पहिचान गरेको जानकारी पनि दिए । उनले  सरकारको तर्फबाट एउटा राम्रो भविष्य भएको वस्तुको रुपमा पहिचान गर्नु नै सरकारले यो क्षेत्रलाई प्राथमिकता दिएको पुष्टि हुने बताए । 

उनले भने ‘ हाते कागज परम्परागत वस्तु हो । यो एउटा मौलिक र दिगोपन भएको वस्तु पनि हो र यसलाई त्यही अनुरूप बजारी करण गर्न सकियो भने यसको अन्तराष्ट्रिय बजारको सम्भावना पनि छ, हामीले यस्तो प्रकारको मौलिक उत्पादनको प्रवर्द्धन गर्नको लागि बजेट पनि छुट्याएका छौ । यसको प्रवर्द्धन बढाउन र स्वदेशी उत्पादन बढाउन र निर्यात गर्न कस्तो खालको व्यवस्था गर्नुपर्छ त्यसबाट छुट्याइएको बजेट पनि खर्च हुन्छ । ’ 

अहिलेको चुनौती भनेको नै व्यापार घाटा भएको उल्लेख गर्दै सचिव मरासिनीले भने ‘ त्यो घटेको विदेशी कच्चा पदार्थमा आधारित वस्तुको निर्यात घट्यो । स्वदेशी कच्चा पदार्थमा आधारित वस्तुहरू गलैँचा, पस्मिना, चिया हरेकको निर्यात बढेको छ । स्वदेशकै कच्चा पदार्थबाट वस्तु उत्पादन गर्न सकियो भने त्यो दिगो हुन्छ । ’ 

हाते कागजले नेपाली परम्परा र मौलिकता बोक्नुको साथै साना तथा मझौला उद्योगीहरुले उत्पादन गर्ने विषय भएको चर्चा गर्दै सचिव मरासिनीले योसँग साना उद्योगीहरुको आम्दानी र रोजगारीसँग जोडिएको र यसको प्रबर्द्धन हुनु भनेको आम नेपालीहरूको स्तर र रोजगारी वृद्धि हुनु भएको बताए । 

उनले भने ‘ निजी क्षेत्रले पनि यस्तो खालको वस्तुको बजारी करण गर्नुपर्छ । हामीले बजारी करण र अनुसन्धानमा खर्च गर्ने हो भने यसको सम्भावना धेरै हुन्छ । यस्तो वस्तुको पहिचान गरेर यसको प्रदर्शन गर्ने व्यवस्था गर्नुपर्छ । ’