मापदण्डविपरीत चलाइएको भन्दै मेडीसिटीसहित ८ अस्पताललाई कारबाही गर्ने स्वास्थ्य मन्त्रालयको तयारी

१९ साउन, काठमाडौं । स्वास्थ्य तथा जनसंख्या मन्त्रालयले तोकिएको मापदण्ड अनुसार सञ्चालन नगरिएको भन्दै विभिन्न ८ वटा अस्पतालहरूलाई कारबाही गर्ने भएको छ । उनीहरूमाथि कुन हदसम्मको कारबाही गर्ने भन्ने बारे स्वास्थ्य मन्त्री र मन्त्रालयका अधिकारीहरूबीच छलफल चलिरहेको छ । मन्त्रालयमा पटक पटक अस्पतालहरुबिरुद्ध उजुरी आएपछि बिहीबार ती अस्पतालहरूको निरीक्षण गरिएको थियो ।   

मन्त्रालयमा उजुरी आएपछि बिहीबार स्वास्थ्य मन्त्री मोहनबहादुर बस्नेत नेतृत्वको टोली अनुगमनमा निस्किएको थियो । अनुगमनपछि उपत्यकाका आठ वटा अस्पतालमाथि कारबाही नै गर्नुपर्ने देखिएकाले कारबाहीबारे मन्त्रालयमा छलफल भएको हो । अनुगमन गरिएका अस्पतालमा स्वास्थ्य संस्था सञ्चालन मापदण्ड नै लागु नभएको पाइएको अनुगमनमा संलग्न एक कर्मचारीले बताए । 

अनुगमनमा मन्त्री बस्नेतसहित सचिवहरू डा.विकास देवकोटा, डा. टंक बराकोटी, डा.संगीता कौशल मिश्र र स्वास्थ्य सेवा विभागका महानिर्देशक डा.दीपेन्द्ररमण सिंहको नेतृत्वमा चार वटा टोली बनाइएको थियो । हरेक टोलीमा प्याथोलोजिस्ट, रेडियोलोजिस्ट, नर्सिङ अधिकृत, फर्मासिस्ट, माइक्रोबायोलोजिस्ट, स्त्री तथा प्रसूतिरोग विशेषज्ञ, सरुवा रोग विशेषज्ञ, मानव संसाधनका विज्ञलाई सहभागी गराइएको थियो । 

अनुगमन गरिएकामा नेपाल मेडिकल कलेज जोरपाटी, शंकरापुर अस्पताल जोरपाटी, अल्का अस्पताल जावलाखेल, मेडीसिटी अस्पताल भैँसेपाटी, कान्ति बाल अस्पताल महाराजगञ्ज, मनमोहन सामुदायिक अस्पताल स्वयम्भू, भक्तपुर अस्पताल र नागरिक सामुदायिक अस्पताल गठ्ठाघर भक्तपुर रहेका छन् ।

अनुगमनमा संलग्न टोलीले प्रस्तुत गरेको प्रारम्भिक रिपोर्टका आधारमा अधिकांश अस्पतालहरूले मापदण्ड पालना नगरेको नपाइएको हो । सो क्रममा अस्पतालहरूले कूल शैयाको १० प्रतिशत विपन्नलाई निःशुल्क उपचारका लागि छुट्याउनुपर्नेमा त्यसो नगरेको पाइएको थियो ।

आवश्यकताभन्दा बढी शल्यक्रियामार्फत डेलिभरी गराएको, प्याथोलोजी व्यवस्थित नभएको, स्टाफ नर्स तथा सहायक स्तरका कर्मचारीहरूलाई न्यूनतम् तलब समेत नदिइएको पाइएको छ । अस्पतालजन्य फोहोर व्यवस्थापनको उचित व्यवस्थापन नगरेको, अस्पतालमा उपलब्ध सेवा सार्वजनिक नगरिएको लगायतका धेरै मापदण्ड विपरीतका कार्य भएको पाइएकाले कारबाही गर्न लागिएको हो ।