एकीकृत समाजवादीका केन्द्रीय सदस्य कर्माचार्य पार्टीबाट निष्कासित

१९ साउन, काठमाडौं । सत्तागठबन्धनका घटक नेकपा (एकीकृत समाजवादी)का केन्द्रीय सदीय सुवास कर्माचार्य पार्टीबाट निष्कासित भएका छन् । सिन्धुपाल्चोक जिल्ला इन्चार्ज समेत रहेका कर्माचार्यलाई कीर्तिपुरमा शुक्रबार बसेको पार्टीको केन्द्रीय सचिवालय बैठकले साधरण सदस्यता समेत नरहने गरी निष्कासन गरेको हो । 

पार्टीको नीति, कार्यक्रम र सङ्गठनात्मक पद्धतिविपरीत कार्य गरेको र सच्चिन अस्वीकार गरेको जनाउँदै निष्कासन गरिएको एकीकृत समाजवादीले जनाएको छ । कर्माचार्य एमाले प्रवेशको तयारी गरेको ठहरसहित निष्कासन कारवाही गरिएका पार्टीका उपमहासचिव तथा प्रचार विभाग प्रमुख जगन्नाथ खतिवडाले जानकारी दिए ।

एकीकृत समाजवादी एमालेबाट माधवकुमार नेपालको नेतृत्वमा फुटेर बनेको पार्टी हो । पार्टीसँग अहिले संघीय संसदमा १० सांसद छन् । निर्वाचन आयोगले तोकेको मत कटाउन नसक्दा एकीकृत समाजवादी राष्ट्रिय पार्टी बन्नबाट चुकेको छ । यसपछि पार्टीभित्र नेतृत्व र पार्टी नीतिको विरोध हुने क्रम रोकिएको छैन । हाल सरकारमा पार्टीबाट दुई जना मन्त्री छन् । कर्माचार्य पनि पार्टी नेतृत्व र नीतिको खरो विरोध गर्दै आएका थिए ।