कांग्रेस लुम्बिनीले जिल्ला सभापति र क्षेत्रीय सभापतिलाई भदौ पहिलो साता प्रशिक्षण दिने

१९ साउन, भालुवाङ । नेपाली कांग्रेस लुम्बिनी प्रदेशले भदौ पहिलो साता प्रशिक्षण कार्यक्रमको आयोजना गर्ने भएको छ । शुक्रबार दाङको भालुबाङस्थित प्रदेश कार्यालयमा बसेको प्रशिक्षण विभागको बैठकले आगामी भाद्र महिनाको पहिलो हप्ता प्रशिक्षण आयोजना गर्ने निर्णय गरेको हो । 

लुम्बिनी प्रदेशस्थित १२ जिल्ला सभापति, २६ प्रतिनिधिसभा क्षेत्रीय सभापति र ५२  प्रदेशसभा क्षेत्रीय सभापतिको लागि प्रशिक्षण कार्यक्रम गर्न लागिएको प्रदेश उपसभापति एवं प्रशिक्षण विभाग प्रमुख भुवनप्रसाद श्रेष्ठले बताए । नवलपरासी पश्चिममा आयोजना गरिने प्रशिक्षणलाई वरिष्ठ नेता डा. शेखर कोइराला लगायतका शीर्ष नेताहरूले सम्बोधन गर्ने बताइएको छ ।  

समय अनुकूल पार्टी संगठन चलायमान बनाउन तह गत नेतृत्वको लागि प्रशिक्षण दिन लागिएको लुम्बिनी कांग्रेसका सभापति अमरसिंह पुनले बताए । प्रशिक्षण पश्चात पार्टीको सैद्धान्तिक दृष्टिकोण, कार्यक्रम, आगामी योजना र सांगठनिक गतिविधि ग्राउन्ड तहमा पुग्न विशेष आधार तय हुने सभापति पुनले बताए । प्रशिक्षण विभागले अबदेखि विभिन्न घुम्ती बैठक सन्चालन गर्ने र आगामी बैठक पाल्पा जिल्लामा आयोजना गरिने विभागले जनाएको छ ।