म प्रधानमन्त्री भएर आएको ७ महिना बित्याे, अझै मन्त्रिपरिषदका निर्णयहरु कार्यान्वयन भएका छैनन् : प्रधानमन्त्री

१९ साउन, काठमाडौं । प्रधानमन्त्री पुष्पकमल दाहाल प्रचण्डले मन्त्रिपरिषदले गरेका कैयौँ निर्णयहरू अझै पनि कार्यान्वयन हुन नसकेको भन्दै चिन्ता व्यक्त गरेका छन् ।

शुक्रबार प्रधानमन्त्री तथा मन्त्रिपरिषदको कार्यालय सिंहदरबारमा आयोजित मन्त्रालय स्तरीय समस्या समाधान समितिको बैठकमा प्रधानमन्त्री प्रचण्डले निर्णय कार्यान्वयनको विषयलाई लिएर चिन्ता व्यक्त गरेका हुन् । उनले अब देखिने गरी काम गर्न मातहतका निकायलाई निर्देशन पनि दिए ।

उनले मन्त्रिपरिषदले गरेका कैयौँ निर्णयहरू अझै पनि कार्यान्वयन हुन नसक्नुको कारण पत्ता लगाउनुपर्ने बताए । यो विषयमा उचित र प्रभावकारी समन्वय प्रधानमन्त्री कार्यालयबाट हुन नसकेको उनको ठहर छ । यसमा देखिने गरी सुधारका लागि आजैदेखि काम थल्न उनले निर्देशन दिए ।  प्रधानमन्त्री कार्यालयका कार्यहरूको वार्षिक क्यालेन्डर तयार गरी लागू गर्न उनले निर्देशन दिए ।

प्रधानमन्त्री तथा मन्त्रिपरिषद कार्यालयका कर्मचारीहरूले दैनिक रूपमा आफूले गरेका कार्यहरूको डायरी लगत तयार गरी लिखित रूपमा एक तहमाथिको सुपरीवेक्षकसमक्ष पेश गर्न र सोही अनुसार कर्मचारीको पाक्षिक रूपमा मूल्यांकन गर्ने प्रणालीको सुरुवात गर्नुपर्ने प्रचण्डको भनाइ छ ।  

प्रधानमन्त्री प्रचण्डले कार्यालयलाई स्मार्ट र सेन्टर अफ एक्सिलेन्सको रूपमा विकास गर्नुपर्ने बताए । उनले भने, ‘अहिले म प्रधानमन्त्री भएर आएको ७ महिना बितिसकेको छ । प्रधानमन्त्री तथा मन्त्रिपरिषदको कार्यालय देशको सर्वोच्च कार्यकारी निकाय हो । यहाँबाट हुने कार्यसम्पादनको प्रतिबिम्बले सिँगो देशको कार्यप्रगति र सरकारको प्रतिविम्ब झल्किन्छ । त्यसैले हामी स्मार्ट र सेन्टर अफ एक्सिलेन्सको रुपमा विकास हुन जरुरी छ । प्रधानमन्त्री कार्यालय जगेडा कर्मचारी थन्काउने थलो भनेर जसरी विम्ब स्थापना गर्न खोजिएको छ, त्यसलाई चिर्न पनि जरुरी छ ।’

प्रधानमन्त्री तथा मन्त्रिपरिषद कार्यालय र अन्तर्गतका निकायहरूले गरेका कार्य प्रगतिको समीक्षा गर्दा समस्याका चाङ पनि यथावतै रहेको उनको भनाइ छ । प्रधानमन्त्री प्रचण्डले सरकारी कर्मचारी तथा पदाधिकारीहरूको वैदेशिक भ्रमणलाई उपयोगी एवं नतिजामुलक र व्यवस्थित बनाउन आवश्यक रहेको बताए । उनले नेपालको तर्फबाट प्रतिनिधित्व गर्नुपर्ने र आवश्यकता देखिएका बाहेकका वैदेशिक भ्रमणलाई निरुत्साहन गर्नुपर्ने बताए ।