प्रहरीका फूटबल खेलाडीबीच कुटाकुट हुँदा एक जना सख्त घाइते

२० साउन, काठमाडौं । नेपाल प्रहरीका दुई फूटबल खेलाडीबीच झगडा हुँदा एक जना सख्त घाइते भएका छन् । प्रहरी नायब निरीक्षक (सइ) रितेश थापाले फुटबलका राष्ट्रिय खेलाडी भरत शाहलाई कालोपुलको झिर रेष्टुरेण्टमा बोलाएर कुटपीट गरेका हुन् । घाइते भएको फूटबल खेलाडी नेपाल प्रहरीका सहायक हवल्दार हुन । उनको ट्रमा सेण्टरमा उपचार हुन नसकेपछि विएण्डबी अस्पतालमा उपचार भइरहेको छ ।

फूटबल खेलाडी रहेको सई थापाले शाहलाई कुटपिट गरेको भन्दै प्रहरी वृत्त मालीगाउँमा उजुरी गरेका छन् । दुवैले झिर रेष्टुरेण्टमा मदिरा सेवन गरेको र त्यस क्रममा झगडा हुँदा थापाले साहलाई सख्त घाईते हुने गरी कुटपिट गरेका हुन् । अनन्तको अस्ट्रेलियाको भिसा लागेको अवसर उनीहरू दुवै जनाले खुसी साटासाट गर्ने भन्दै झिरमा रेष्टुरेण्टमा मदिरा सेवन गरेका थिए ।

खेल र केटीको विषयमा विवाद भएपछि थापाले बियरका ग्लासले भरतको टाउकोदेखि शरीरका विभिन्न भागमा हिर्काएका थिए ।  भरतको शरीरमा १८ वटा टाँका लागेको प्रहरी स्रोतले जनाएको छ । उनीहरू झगडा गरेको विषयमा एकेडमीका कार्यरत एससएपी बेलबहादुर पाण्डेको नेतृत्वमा छानबिन समिति गठन भएको छ ।

समितिले घटनाको सिसिटिभी फुटेज ल्याएर अध्ययन गर्दा  फुटेजमा सुरुमा रितेशले भरतलाई लात्ताले हानेको र त्यसपछि भरत रिसाएको देखिएको छ । ‘उनीहरुको विषयमा थापालाई निलम्बन गरेर अनुसन्धान हुँदैछ, प्रहरी परिसरका एक अधिकारीले भने । सो घटना साउन १० गते राती भएको प्रहरी परिसर काठमाडौंले जनाएको छ ।