रोहित चौधरीको हत्या घटनामा थप एक पक्राउ

२१ साउन, काठमाडौं । सुनसरीको धरानस्थित सेउतीखोला नजिकैको जंगलमा विराट महानगरापलिका–५ का २८ वर्षीय रोहित चौधरीको यही साउन ५ मा गोली हानी भएको हत्या घटनामा संलग्न आरोपमा थप एक पक्राउ परेका छन् । 

सुनसरी प्रहरीका अनुसार पक्राउ पर्नेमा सुनसरीको धरान उपमहानगरपालिका ४ का २७ वर्षीय ज्याङ्लो भन्ने युनेश राईलाई गोलीसहित पक्राउ गरिएको हो ।

पक्राउपछि घर खानतलासी गर्दा ७.६५ एमएमको ८ राउन्ड गोली बरामद भएको प्रहरीले जनाएको छ । 
जन्म दिनमा चौधरी युवतीसहित घुमफिर गरेर विराटनगर फिर्ता हुने क्रममा पेस्तोलसहितको लुटेरा समूहले युवतीलाई नियन्त्रणमा लिई उनको साथमा रहेको सुनका गहना लुटपाट गर्ने क्रममा प्रतिकार गर्दा गोली हानी हत्या भएको खुलेको थियो । रोहितको हत्यापछि कुटपिट गरी छाडिएका युवतीले प्रहरीलाई बताएको हुलियामा आधारमा लुटेरा समूहका सदस्यहरु धमाधम पक्राउ परेका हुन् । 

हत्यामा संलग्नताको आरोपमा हालसम्म प्रहरीले ५ जनालाई पक्राउ गरेको छ । यसअघि  झापाको भद्रपुरका ३० वर्षीय प्रकाश लिम्बु, विराटनगरका ४१ वर्षीय अजयकुमार शर्मा, मोरङको लेटाङ नगरपालिका–१ का ३५ वर्षीय दीपक तिमिल्सिना, सुनसरी धरान उपमहानगरालिका–१० का ३४ वर्षीय अनसन तामाङ पक्राउ परिसकेका छन् । 

अभियुक्त सबैलाई प्रहरीले इलाका प्रहरी कार्यालय ईटहरीको हिरासतमा राखेर अनुसन्धान गरिरहेको छ । गोलीबाट गम्भीरु घाइते रोहितको उपचारका क्रममा सोही दिन धरानस्थित वीपी मेमोरियल अस्पतालमा मृत्यु भएको थियो ।

यो पनि पढ्नुहोस