आगामी सेप्टेम्बरको तेस्रो साता प्रधानमन्त्री प्रचण्ड चीन भ्रमणमा जाने, परराष्ट्रले थाल्यो तयारी

२१ साउन, काठमाडौं । प्रधानमन्त्री पुष्पकमल दाहाल प्रचण्डले सेप्टेम्बरको तेस्रा साता छिमेकी मुलुक चीनको भ्रमण गर्ने भएका छन् । प्रधानमन्त्रीको चीन भ्रमणबारे पराराष्ट्र मन्त्रालयले जानकारी दिएको हो । आइतबार कन्सुलर सेवा विभागमा अनलाइन कन्सुलर प्रमाणीकरण सेवाको शुभारम्भ गर्दै परराष्ट्रमन्त्री एनपी साउदले सेप्टेम्बरको तेस्रो–चौथो साता प्रधानमन्त्रीको चीन भ्रमण गर्ने तयारी भइरहेको जानकारी दिएका हुन् । 

वर्तमान सरकार गठनपछि प्रधानमन्त्री प्रचण्डको फलदायी भारत भ्रमण भएको उल्लेख गर्दै मन्त्री साउदले सो अवसरमा महत्वपूर्ण उपलब्धि हासिल भएको बताए । उनले अन्तर्राष्ट्रिय सम्बन्ध परस्पर राष्ट्रिय हित र स्वार्थका आधारमा अघि बढाउँदा नै मुलुक र जनताको हित हुने उल्लेख गर्दै विदेश नीतिका सम्बन्धमा सबै पार्टी र पक्षबीच सहमति हुनुपर्ने धारणा व्यक्त गरे ।  

मन्त्री साउदले परारष्ट्रय सम्बन्ध सन्तुलनमा रहेको बताए । सरकारले परराष्ट्र सम्बन्धलाई राष्ट्रिय स्वाभिमान र राष्ट्रिय एकतालाई मजबुत पार्नेगरी अगाडि बढाएको उनको भनाइ छ । विगतका सरकारले बिगारेको सम्बन्धलाई अहिले सन्तुलित र समधुर बनेको उनको दाबी छ । 

उनले प्रमाणीकरण सेवालाई सर्वसाधारण सेवाग्राहीलाई राहत मिल्ने विश्वास व्यक्त गरे । दुर्गम क्षेत्रबाट काठमाडौं आउनुपर्ने बाध्यतालाई हटाउने र अनावश्यक खर्चबाट सेवाग्राहीलाई राहत मिल्ने उनको भनाइ थियो ।  कन्सुलर सेवाका लागि हजारौं खर्च गरेर टाढाबाट सेवाग्राही आउनुपर्ने बाध्यता हट्ने र घरबाटै अनलाइनमार्फत पूर्ण सेवा लिन सकिने व्यवस्था मिलाइएको बताए । विभागले प्रहरीले प्रदान गरेको चारित्रिक प्रमाणपत्र अनलाइनबाटै प्रमाणीकरण गरिदिने व्यवस्था सुरू गरिएकाे हाे । साथै सेवाबाट विभागमा सेवाग्राहीको भीड पनि कम हुने बताए ।

साथै सरकारले बायोमेट्रिक लगायतका कामहरु सरकारको एक कार्यालयमा गरेपछि पुग्ने व्यवस्थाका लागि छलफल समेत भइरहेको समेत जानकारी दिए ।