केन्द्रीय बैठकमा जवाफ दिँदै प्रचण्ड, भने- ‘पार्टी र नेतृत्व घेराबन्दीमा छ’

२१ साउन, काठमाडौं । सरकारले नेतृत्व गरिरहेका नेकपा (माओवादी केन्द्र)का अध्यक्ष प्रचण्ड अहिले पार्टीको केन्द्रीय समितिको बैठकमा जवाफ दिइरहेका छन् । कमलादीस्थित बुधबार सुरु भएको चौथो पूर्ण बैठकमा २ सय भन्दा बढी केन्द्रीय सदस्यहरुले उठाएका प्रश्नको जवाफ दिने क्रम जारी छ । 

बिहान मात्र पदाधिकारी बैठक राखेर पदाधिकारीहरुको जिम्मेवारी फेरबदल गरेका उनले केन्द्रीय तहका सबै नेताहरुको जिम्मेवारी तोक्ने प्रस्ताव पेस गर्दैछन् । अहिले बैठकमा विचार, संगठन र कार्यशैलीबारे उठेका प्रश्नको जवाफ दिइरहेका छन् । 

सो क्रममा प्रधानमन्त्री समेत रहेका उनले पार्टीले सरकारको नेतृत्व गरेर भ्रष्टाचार र तस्कर, माफियाविरुद्ध कारवाही अभियान चलाइरहेको र यसलाई रोकिने बताउँदै सरकारको काम र आन्दोलनबाट प्राप्त उप्लब्धिको रक्षा गर्न पार्टीका नेता कार्यकर्तामा मनोबल कमजोर देखिएको बताएका छन् । उनले जवाफ दिने क्रममा पार्टी पार्टी जस्तो नभएको र यसलाई अब रुपान्तरणसहित पहिलो नम्बरको पार्टी बनाउने काममा लाग्न निर्देशन दिएको  एक सहभमागीले बताए ।

देश र जनताको हितका लागि पार्टी १० वर्ष लामो सशस्त्र संघर्षबाट शान्ति प्रक्रियामा आएपछि पनि विभिन्न पक्ष र समूहले ‘१७ हजारे’ भनेर अराजनीतिक टिप्पणी जारी रहेको भन्दै प्रतिवाद गर्न पार्टी पंक्ति एक हुनुको विकल्पन रहेको उनले बताएका छन् । संघर्षमा तत्कालीन विद्रोही माओवादी र राज्य पक्षबाट गरी १७ नागरिकको ज्यान गएको ठानिएको छ । यसको यकिन पुष्टि भने अझै हुन बाँकी छ । ८ हजार भन्दा बढी नागरिक बेपत्ता रहेको भन्ने विषय पनि स्वतन्त्र पुष्टि हुन बाँकी नै छ । 

समाज र राजनीतिक क्षेत्रमा अझै पनि माओवादी भनेका हत्यारा हुन् भन्ने भाष्य तयार पार्न खोज्ने समूह सक्रिय रहेको र यसबाट राजनीतिक उप्लब्धि गुम्ने खतरा कायमै रहेको प्रचण्डको भनाइ रहेको सहभागीले बताएका छन् । उनले हरेक केन्द्रीय सदस्य वडा तहमा पुगेर जनतासँगको सम्बन्ध बलियो बनाउने र उनीहरुको पीर मर्का बुझ्ने काम तत्कालैबाट सुरु हुने गरी कार्यक्रम ल्याइने बताएकाे उनले बताए ।

साथै, अध्यक्ष प्रचण्डले पार्टी र पार्टी नेतृत्व अझै चर्को घेराबन्दीमा रहेको बताएका छन् । घेराबन्दी तोड्ने र आन्दोलनबाट प्राप्त उप्लब्धि रक्षा गर्ने कार्यक्रम बैठकले दिने उनको भनाइ रहेको बताएका छन् । सशस्त्र द्वन्द्वका घटनालाई लिएर प्रचण्ड लगायत तत्कालीन माओवादीका नेताहरुविरुद्ध अदालतमा बाल सेना प्रयोगदेखि ज्यानसम्बन्धी मुद्दा समेत पर्न छाडेका छैनन् ।

बैठकमा बोल्ने अधिकांश नेताहरुले नेतृत्व पुस्तान्तरण र नेताहरुको कार्यशैली जनवादी बनाउन बैठकले ठोस नीति तय गर्नुपर्ने बताउँदै आएका छन् । शान्ति प्रक्रियामा आएपछि विलासी जीवन बिताइरहेका नेताहरुको सम्पत्ति छानबिन हुनुपर्ने माग पनि नेताहरुले बैठकमा जोडदार उठाएका छन् ।

बैठक पाँच दिनसम्म चलेर आजै समापन हुँदैछ ।