लम्पी स्किन रोगबाट कोशीमा साढे ६ हजार पशु मरे

२१ साउन, काठमाडौं । महामारीको रुप लिएको लम्पी स्किन रोगको प्रकोपबाट कोशी प्रदेशमा मात्र साढे ६ हजार बढी चौपाया मरेको तथ्यांक सार्वजनिक भएको छ ।

कोशी प्रदेश पशुपन्छी तथा मत्स्यविकास निर्देशनालय विराटनगरले दिएको जानकारी अनुसार गोई र गोरु गरी ६ हजार ६ सय १४ र राँगा र र्भैसी गरी ७२ वटा चौपाया मरेको हो । कोशीमा १४ वटा जिल्ला छन् । सबै जिल्लामा प्रकोप फैलिएको छ । 

निर्देशनालयका अनुसार हालसम्ममा कोशीमा लम्पी स्किनबाट २ लाख ३७ हजार ४२१ वटा पशुचौपाया प्रभावित भएका छन् । हालसम्म १ लाख ३२ हजार ३४९ वटा पशुचौपायालाई खोप लगाइएको छ । झापा, मोरङ र सुनसरीमा रोग नियन्त्रणमा आउन नसकेको निर्देशनालयले जनाएको छ । 

देशभरमा रोगबाट ३५ हजार बढी चौपाया मरेको र २० लाख बढी संक्रमित भएको सरकारको भनाइ छ । गोरु मर्ने र बिरामी परेका कारण पहाडी क्षेत्रका किसानले धेरै मात्रामा खेत खनेरै धान रोपाइँ गरेका छन् ।

यो रोग लाग्दा वस्तुमा उच्च ज्वरो आउने र शरीरमा गिर्खा उठ्ने र फुटेर घाउ पर्ने लक्षण देखिने गरेका छन् । समयमै औषधि र खोप नपाउँदै पशु मरेको किसानहरुको भनाइ छ ।