माओवादीले भदौ १६ देखि मंसिर १५ सम्म रुपान्तरण अभियान चलाउने, नेतालाई गाउँ जान प्रचण्डको निर्देशन

२१ साउन, काठमाडौं । नेकपा माओवादी केन्द्रले तीन महिने पार्टी रुपान्तरण अभियान सञ्चालन गर्ने भएको छ । माओवादी केन्द्रको केन्द्रीय कमिटीको आइतबारको बैठकले जनतासँग माओवादी विशेष रुपान्तरण अभियान निर्णय गरेको हो । अभियान भदौ १६ देखि मंसिर १५ सम्म सञ्चालन गरिने छ । 

अभियान अन्तर्गत अध्यक्ष पुष्पकमल दाहाल प्रचण्ड आफू पनि सात वटै प्रदेशका ७ वटा वडामा जाने भएका छन् । ती वडामा गएर प्रचण्डले जनतासँग प्रत्यक्ष साक्षात्कार गर्ने बताएका छन् । उनले नयाँ सन्दर्भमा जनयुद्धकालीन स्टाइलमा परिचालन हुन नेता कार्यकर्तालाई निर्देशन पनि दिएका छन् ।   जनताको अपेक्षा र राष्ट्रिय आवश्यकताको प्रतिनिधित्व गर्ने गरी काम गर्न उनले निर्देशन दिएका हुन् । 

प्रचण्डले आफूहरुविरुद्ध घेराबन्दी भइरहेको पनि बताएका छन् । बुधबारदेखि जारी केन्द्रीय समिति बैठकलाई आइतबार सम्बोधन गर्दै प्रचण्डले नेतृत्वविरुद्ध मुद्दा लगाउन खोजेकै कारण तत्कालीन प्रधानन्यायाधीश चोलेन्द्रशम्शेर जबराविरुद्ध महाभियोग दर्ता गर्नु परेको बताए ।

तिनका षडयन्त्र परास्त गर्न राजनीतिक दलले पनि सहयोग गरेर तिनलाई महाअभियोग लगाउनु पर्ने अवस्था आयो उनले भने, ‘हामी माथि मुद्दा लगाउन खोज्नुको पछाडि विचार वर्ग पक्षधरता थियो र आज पनि छ । आज पनि लिडरसिप र पार्टीमाथि घेराबन्दी छ, जेल हाल्ने कुरा गरेका छन् अझै ।’ यद्यपि यो बैठकबाट पार्टी मुख्य नेतृत्वको वरिपरि एकतावद्ध हुने स्थिति बनेको बताए । वाद प्रतिवाद र संवादमार्फत पार्टी एकढिक्का र एकतावद्ध बनाउन ३ महिना अभियान चलाएपछि पार्टी नयाँ बन्ने उनले  दाबी गरे ।

प्रचण्डले ७५३ वटै पालिकाको वडामा गएर काम गर्न केन्द्रीय सदस्यहरूलाई निर्देशन दिएका छन् । केन्द्रीय सदस्यहरूमाथि नेतृत्व भूगोलमा नगएको आरोप लागेपछि अध्यक्ष प्रचण्डले जवाफ फर्काउँदै  र बैठकमा उठेको प्रश्नको जवाफ दिँदै उनले सातै प्रदेशमा एक एक वडाको जिम्मेवारी लिन नेताहरूलाई निर्देशन दिए ।