माेटरसाइकलको ऐनाभित्र लुकाएर लागुऔषध कारोबार

२१ साउन, काठमाडौं । लागुऔषध कारोबारीले लागू पर्दाथ ओसारपसारमा विभिन्न तरिका अपनाउने गरेको पाइएको छ । कैलालीको धनगढीमा शनिबार कारोबारीले मोटरसाइकल (बाइक)को लुकिङ ग्लासभित्र लागुऔषध लुकाइछिपाइ राखेको अवस्थामा मोटरसाइकल चालकलाई प्रहरीले पक्राउ गरेको छ। 

शनिबार एकैदिन कैलालीको धनगढी र अत्तरियाबाट मात्र विभन्न लागुऔषधसहित ४ जना युवालाई पक्राउ गरिएको छ । ऐनाभित्र लागुऔषध क्यापसु र ट्रयाब्लेट लुकाएर १ ग्राम ३३० मिलिग्राम राखेर आइरहेको अवस्थामा चेकजाँचका क्रममा प्रहरीले मोटरसाइकलसहित धनगढी उपमहानगरपालिका–२ त्रिनगरबाट गोदावरी नगरपालिका–५ का २९ वर्षीय दिपक रानालाई शनिबार साँझ पक्राउ गरिएको छ । 

भारतबाट नेपालतर्फ आउँदै गरेको सुप्र ०१०१० प ४५३७ नम्बरको मोटरसाइकललाई जाँच गर्ने क्रममा ऐनाभित्र लागुऔषध लुकाएर ल्याइरहेको अवस्थामा उनलाई पक्राउ गरिएको प्रहरीले जनाएको छ । 

यस्तै, गोदावरी नगरपालिका–२ अत्तरियाबाट ८ सय २० मिलीग्राम लागूऔषधसहित गोदावरी–३ का युवक तेजबहादुर खडकासहित ३ जनालाई शनिबार नै प्रहरीले पक्राउ गरेको छ ।