राजश्व अनुसन्धान विभागद्वारा आरोपीसहित सुन तस्करीको मुद्दा अभियोजनको जिम्मेवारी सीआईबीमा हस्तान्तर

२१ साउन, काठमाडौं । राजश्व अनुसन्धान विभागले एक क्विन्टल सुन तस्करी प्रकरणमा पक्राउ परेका सबै आरोपितसहित सम्पूर्ण अनुसन्धानको जिम्मा  नेपाल प्रहरीको केन्द्रीय अनुसन्धान ब्यूरो (सीआईबी) लाई जिम्मा लगाएको छ ।

आइतबार पत्रकार सम्मेलन गरेर विभागले सुन तस्करी प्रकरणको बाँकी काम जिम्मा लगाएको हो । विवादमा आएपछि प्रधानमन्त्री पुष्पकमल दाहाल प्रचण्डले यसको जिम्मा सीआईबीलाई दिन निर्देशन दिएका थिए ।

अन्तरदेशीय संगठित अपराध भएकाले विभागले थप छानबिन र मुद्दा अभियोजनको सम्पूर्ण जिम्मेवारी प्रहरीलाई सुम्पिएको हो । पक्राउ परेका सबै आरोपितलाई पनि प्रहरीको जिम्मा लगाइने विभागका महानिर्देशक नवराज ढुंगानाले बताए ।

राजश्व अनुसन्धान विभागले अनुसन्धान चलिरहेको मुद्दा प्रहरीलाई सुम्पिएको हो । २ साउनमा विभागले एक सय किलो सुन विमानस्थल भन्सारको मुल गेटमा बरामद गरेको थियो । हङकङबाट नेपालमा भित्र्याइएको सो सुन प्रकरणमा हालसम्म २ जना चिनियाँ र एक भारतीयसहित १८ जना पक्राउ परिसकेका छन् । पक्राउ पर्नेमा ३ जना विमानस्थल भन्सारका कर्मचारी पनि रहेका छन् ।

सुन बरामद भएको तेस्रो सातासम्म विभागले सुन तस्करको बालुवाटार, लाजिम्पाट, सोह्रखुट्टे र टोखाका चार वटा गोदाममा छापा मारेको थियो । ब्रेक शु सहित समातिएको १ सय किलोको सुन अहिले राष्ट्र बैंकको टक्सार शाखामा राखिएको छ । अहिलेसम्म सुनको नापतौल भएको छैन ।