माओवादी केन्द्र सीसीको निर्णय : सबै तहका कमिटी निर्वाचनबाट चयन गरिने

२१ साउन, काठमाडौं । नेकपा (माओवादी केन्द्र)को आइतबार सम्पन्न भएको केन्द्रीय समिति (सीसी)को चौथो पूर्ण बैठकले पार्टीका सबै तहका कमिटीहरु निर्वाचनमार्फत चयन गर्ने निर्णय गरेको छ । हालसम्म टिके प्रथाबाट कमिटीहरु चयन गर्दै आइरहेको थियो । 

बैठकले पार्टी र जनसंगठनका सबै कमिटीहरु निर्वाचनमार्फत गठन गर्ने निर्णय भएको केन्द्रीय सदस्य नारायणी शर्माले बताइन् । पार्टीले आउँदो भदौदेखि ३ महिना पार्टीले ‘जनतासँग पार्टी’ अभियान संचालन गर्ने निर्णय भएको पनि जानकारी दिइन् । 

यस्तै माओवादी केन्द्रका प्रदेश इन्चार्जहरु पनि हेरफेर गरेको छ । पार्टीमा ९ गैर भूगोलसहित ९ प्रदेश रहेका छन् । बधुबारदेखि चार दिनसम्म चलेको सीसी बैठक आज प्रधानमन्त्री समेत रहेका अध्यक्ष प्रचण्डले बैठकमा केन्द्रीय सदस्य, पदाधिकारीहरुले उठाएका प्रश्नको जवाफ दिएपछि समापन भएको छ । ‘माओवादी जिन्दावाद’ नाराले बैठक हल गुञ्जायमान बनाउँदै बैठक सकिएको छ ।

बैठक समापनका क्रममा अध्यक्ष प्रचण्डले पार्टी जागिसकेको र देशको नेतृत्व गर्ने अभिव्यक्ति दिएका छन् । उनले नेताहरुलाई वडा वडामा गएर जनतासँग सम्बन्ध मजबुत बनाउन निर्देशन दिएका छन् । साथै आफू नेतृत्वको सरकारले भ्रष्टाचार र तस्करीका फाइल खोलेको भन्दै साथ दिन र राम्रा कामका प्रचार जोडदार रुपमा गर्न समेत निर्देशन दिएका छन् ।

वर्तमान ८ दलीय गठबन्धन सरकारकाे नेतृत्व माओवादी केन्द्रले गरिरहेकाे छ ।