संसद अवरोध र संसदीय समितिका सभापति चयनबारे छलफल गर्न सभामुखले बोलाए शीर्ष नेताको बैठक

२२ साउन, काठमाडौं । संघीय सदनका दुवै सदनका अवरुद्ध बैठक खुलाउने र संसदीय समितिका सभापतिहरु चलयन गर्नुपर्ने विषयमा छलफल गर्न सभामुख देबराज घिमिरेले तीनदलका शीर्ष नेतासहितको बैठक बोलाएका छन् । निरन्तर संसद बैठक अबरोध भइरहेको र संसद सुरु भएको ८ महिनासम्म पनि संसदीय समितिका सभापति चयन गर्न नसकिरहेको बेला सभामुख घिमिरेले दलका शिर्ष नेतासँग बैठक बोलाएका हुन । 

सभामुखको सचिवालयका अनुसार सो बैठक  आज दिउँसो १२ बजे सिंहदरवारस्थित सभामुखको कार्यकक्षमा बस्नेछ । सभामुख घिमिरेले प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल, प्रमुख विपक्षी दल नेकपा एमालेका अध्यक्ष केपी शर्मा ओली र नेपाली कांग्रेसका सभापति शेरबहादुर देउवासहित प्रमुख सचेतक बैठकमा उपस्थित हुने छन् । 

गत साउन १० गते बसेको प्रतिनिधिसभाको बैठकमा प्रमुख विपक्षी दलले सुन काण्डबारे उच्चस्तरीय छानबिन समिति माग गर्दै बैठक अबरुद्ध गरेपछि त्यसपछिका दुई वटा बैठक सूचना टाँसेर स्थगित भएको थियो ।

सभामुख घिमिरेले साउन १५ र १६ गते प्रधानमन्त्री र विपक्षी दलका नेतासँग दुई–दुईपटक टेलिफोन संवाद गरेर अबरोध खुलाउन अनुरोध गरेका थिए भने प्रमुख दलका प्रमुख सचेतक र सचेतकहरुसँग विभिन्न चरणमा ६ पटक भन्दा बढी छलफल गरिसकेका छन ।

आइतबार पनि सिंहदरवारमा प्रमुख सचेतकहरुसँग छलफल गरेका सभामुखलाई सदनको अवरोध खुलाउन शीर्ष नेताकै तहमा बैठक बस्नुपर्ने सुझाव नेताहरुले दिएपछि शिर्ष नेताको बैठक बोलाइएको हो ।