सरकार र पार्टीको बचाउ गर्दै संसद बैठकमा रचनात्मक भूमिका खेल्न माओवादी सांसदलाई निर्देशन

२२ साउन, काठमाडौं । नेकपा माओवादी केन्द्रले पार्टीका सांसदहरूलाई संघीय संसदमा प्रभावकारी र रचनात्मक भूमिका निर्वाह गर्न निर्देशन दिइएको छ । सोमबार बसेको संसदीय दलको बैठकमा प्रधानमन्त्रीसमेत रहेका माओवादी केन्द्रका अध्यक्ष पुष्पकमल दाहाल प्रचण्डले उनीहरूलाई यस्तो निर्देशन दिएका हुन् ।

नेकपा माओवादी केन्द्रले संसदको अवरोध हटाउन र संसदीय समितिका सभापति चयनका गर्न पहल गर्ने निर्णय गर्दै सरकार र पार्टीविरुद्ध भइरहेका षडयन्त्रको प्रतिकारसहित संसदमा रचनात्मक भूमिकामा रहन सांसदहरुलाई निर्देशन दिएको हो । संसद बैठक अवरोध हटाउनेबारे प्रमुख प्रतिपक्ष, प्रतिपक्ष र सत्ता पक्षका नेताहरूसँग छलफल गर्ने निर्णय पनि भएको  बैठकपछि माओवादी केन्द्रका प्रमुख सचेतक हितराज पाण्डेले जानकारी दिए ।

बैठकमा दलका नेता प्रचण्डले सांसदहरूलाई प्रभावकारी भूमिका निर्वाह गर्न निर्देशन दिएको माओवादीका सचेतक हितराज पाण्डेले जानकारी दिए । यस्तै, संसदीय समितिका सभापति चयनका लागि सत्ता र प्रतिपक्ष दलका नेताहरूसित छलफल गरिने भएको छ । बैठकमा प्रचण्डले त्यस विषयमा छलफल अघि बढाइने बताएको सचेतक पाण्डेले जानकारी दिए ।