तेस्राे चरणकाे आन्दाेलनमा देशभर निर्माण ठप्प पार्ने व्यवसायीहरूकाे घोषणा

२२ साउन, काठमाडौं । निर्माण व्यवसायीहरुले आज पनि विरोध प्रदर्शन जारी राखेका छन् । सोमबार बिहान कार्यालय समय सुरु भएसँगै उनीहरुले माइतीघर मण्डलादेखि नयाँ बानेश्वरसम्म र्याली निकालेका छन् । 

सयौंको संख्यामा सेफ्टी ह्याट लगाएर मण्डलादेखि नयाँ बानेश्वरस्थित संसद भवन नजिक पुगेका उनीहरूले आफूहरूकाे माग नसुनेकाे भन्दै सिठ्ठी बजाएर सरकारकाे ध्यानाकर्षण गराए । 

आकाे विराेध कार्यक्रम दाेस्राे चरणअन्तरगतका कार्यक्रम भएकाे उनीहरूले बताए । उनीहरुलाई एभरेष्ट होटल अगाडि प्रहरीले रोकेकाे छ । त्यसपछि उनीहरू सडकमै ब्यानर र प्लेकार्ड राखेर विराेध जनाए । साउन २२ गते साेमबारदेखि २८ गतेसम्मका लागि दाेस्राे चरणकाे कार्यक्रम ल्याएका छन् । 

निर्माण सम्पन्न भइसकेका बिलको भुक्तानी तत्काल गर्न र कच्चा पर्दाथ आपूर्तिका कारण निर्माण कार्य पूरा हुन नसकेका आयोजनाहरूको एकमुष्ट म्याद थप गर्नुपर्ने, उपभाेक्त समितिमार्फत गरिने निर्माण कार्यसम्बन्धी निर्णय खारेज गरिनुपर्ने लगायन माग उनीहरुले अगाडि सारेका छन् । आन्दोलन निर्माण व्यवसायी महासंघको नेतृत्वमा भइरहेको हो ।

दाेस्राे चरणका आन्दाेलनमा पनि माग सुनुवाइ नभए तस्राे चरणका आन्दाेलन घाेषणा गर्ने र त्यसबेला अत्यावश्यकबाहेक देशभरका निर्माण कार्य ठप्प पार्ने घोषणा महासंघले गरेकाे छ ।