काठमाडौं प्रहरी प्रमुख कार्कीविरूद्ध जनजातिको व्यापक प्रदर्शन, थुनुवालाई चरम यातना दिएकाे आराेप

२२ साउन, काठमाडौं । महानगरीय प्रहरी परिसर काठमाडौंका प्रमुख दानबहादुर कार्कीले हिरासतमा राखिएका थुनुवालाई चरम यातना दिएको विरोधमा आदिवासी जनजाति समुदायले बृहत प्रदर्शन गरेका छन् । 

मगर, तामाङ र शेर्पा समुदायमा हाडनाता पर्ने बीच विवाह हुने भनी अभिव्यक्ति दिएकी अधिवक्ता भगवती पाण्डेलाई पक्राउको माग गर्दै टेकु परिसरमा भएको नाराबाजीका क्रममा पक्राउ परेका तामाङ र मगर समुदाय केही व्यक्तिलाई थुनामा राख्दा अमानवीय तरिकाले यातना दिएको भन्दै उनीहरूले प्रदर्शन गरेका हुन् । अहिले प्रदर्शन जारी छ । 

प्रदर्शनमा सयौंको संख्यामा तामाङ, मगर, शेर्पा लगायत विभिन्न जनजातिका महिला पुरुष स्वःस्फूर्त रुपमा सहभागिता जनाइरहेका छन् । थुनामा राख्दा प्रमुख एसएसपी कार्कीको नेतृत्वमा चरम यातना दिएको प्रदर्शनमा सहभागीहरूको भनाइ छ । 

प्रदर्शनकारीहरुले कार्कीलाई निलम्बनर गरी कारवाही प्रक्रिया अगाडि बढाउन माग गरेका छन् । कार्कीविरुद्ध ब्यानर र प्लेकार्ड देखाउँदै ‘राज्य आतंक बन्द गर, यातना दिने प्रहरीलाई कारवाही गर, अधिवक्ता पाण्डेलाई पक्राउर गर’ जस्ता नारा लगाएका छन् । मण्डलाबाट सुरु भएको विरोध जुलुस नयाँबानेश्वर संसद भवनतर्फ जाँदै गर्दा प्रहरीले फलामको बार हालेर एभरेष्ट होटल अगाडि रोकेका छन् ।