सुन तस्करी प्रकरणमा पक्राउ परेका आरोपीहरुलाई थप ७ दिन हिरासतमा राख्न अनुमति

२२ साउन, काठमाडौं । एक क्विन्टल सुन तस्करी प्रकरणमा पक्राउ परेकाहरु आरोपीहरुलाई थप ७ दिन हिरासतमा राखेर अनुसन्धान गर्न अदालतले प्रहरीलाई अनुमति दिएको छ । 

नेपाल प्रहरीको केन्द्रीय अनुसन्धान ब्यूरो (सीआईबी)ले सुन तस्करी प्रकरणमा पक्राउ परेका १८ जनालाई अनुसन्धानमा म्याद थपकाल लागि सोमबार जिल्ला अदालत काठमाडौंमा पेश गरेको थियो । जिल्ला अदालत काठमाडौंले उनीहरुलाई ७ दिन हिरासतमा राख्न अनुमति दिएको हो । 

प्रकरणमा हालसम्म १६ जना पक्राउ परेका र एक जनालाई स्वास्थ्यका कारण अदालतको आदेशमा हाजिर जमानीमा आफन्तको जिम्मा तारेखमा राखिएको छ । 

संगठित अपराध कसुरमा अनुसन्धानका लागि म्याद थप भएको हो । भन्सार विभाग र राजश्व अनुसन्धान विभागले छानबिन गरिरहेको बेला अन्तरदेशीय संगठित अपराध तहका प्रकरण भएकाले प्रकरणका जरासम्म पुग्दा भन्दै विभागले थप अनुसन्धान गर्न आइतबार मात्र सीआईबीलाई लगाएको हो ।