गृहमन्त्रीबाट चित्तबुझ्दो जवाफ नआए अवरुद्ध पार्ने सर्तमा संसद खोल्न एमाले तयार

२३ साउन, काठमाडौं । प्रमुख प्रतिपक्षी दल नेकपा (एमाले) मंगलबारको प्रतिनिधिसभाको बैठक चल्न दिन तयार भएको छ । प्रधानमन्त्रीको सरकार निवास बालुवाटारमा भएको माओवादी केन्द्र, कांग्रेस र एमालेका नेतृत्वबीच भएको छलफलमा यस्तो सहमति भएको हो । 

यसअघिसम्म क्वीन्टल परिणाम भएको सुन तस्करी प्रकरणमा संसदीय छानबिन समिति गठन हुनुपर्ने माग राख्दै प्रतिनिधिसभा र राष्ट्रियसभाको बैठक अवरुद्ध पार्दै आइरहेको छ । अवरोधका कारण पटकपटक स्थगित हुँदै आएको प्रतिनिधिसभाको बैठक आज दिउँसो ३ बजेका बोलाइएको छ । उक्त बैठक चल्न दिने र बैठकमा गृहमन्त्री नारायणकाजी श्रेष्ठलाई बैठकमा  प्रकरणमा भइरहेको छानबिन प्रगतिबारे जवाफ दिने विषयमा सहमति भएको एमालेका सचेतक महेश बर्तौलाले बैठकपछि संचारकर्मीहरुलाई जानकारी दिए । 

मन्त्री श्रेष्ठको जवाफ चित्तबुझ्दो नआए बैठक पुनः अवरुद्ध पार्ने उनले बताए । ‘जति सिठी लगाएपनि नपाक्ने अवस्थामा सरकार पुगेछ, चाम्रो बनेछ’ उनले भने, ‘एमालेले आजको संसद  चल्न दिन्छ, गृहमन्त्रीलाई बोल्न दिन्छ, तर गृहमन्त्रीबाट चित्तब्झ्दो जवाफ नआए तत्काल उठेर अवरुद्ध पार्छ ।’  उनले सत्ता पक्ष प्रतिपक्षलाई थकाउने र गलाउने योजना देखिएको आरोप समेत लगाए । 

सुन प्रकरणमा एमालेले उठाउँदै आइरहेको उच्चस्तरीय छानबिन समिति गठन हुने कुरा नआए बैठक तत्काल अवरुद्ध पार्ने उनको भनाइ छ । 

यस्तै, सरकारको नेतृत्व गरिरहेको माओवादी केन्द्रका प्रमुख सचेतक हितराज पाण्डले बैठकपछि संचारकर्मीहरुसँग बोल्दै एमालेले आजको संसद बैठक चल्न दिन तयार भएको र बैठकमा गृहमन्त्रीबाट सुन तस्करी प्रकरणमाथि भइरहेको छानबिन र अनुसन्धान प्रगतिबारे सदनमा जवाफ दिने बताए । जवाफमा चित्त नबुझे एमालेले पुनः बैठक अवरोधमा जाने कुरा भएको उनले बताए ।