भेपमा सुन तस्करी प्रकरणमा प्रहरीले मिडिया ट्रायल गरिरहेको छ : रवि लामिछाने

२३ साउन, काठमाडौं । राष्ट्रिय स्वतन्त्र पार्टीका सभापति एवं सांसद रवि लामिछानेले भेपमा भएको सुन तस्करीमा प्रहरीले मिडिया ट्रायल गरिरहेको बताएका छन् ।

मंगलबार प्रतिनिधिसभाको बैठकमा दलीय प्रतिनिधिका रुपमा बोल्दै सांसद लामिछानेले क्वीन्टल सुन तस्करीमा प्रहरीको सीआईबीले छानबिन गरिरहेकामा प्रशंसा गर्दै भेपमा राखेर भएको सुन तस्करीबारे अनुसन्धान गर्न नसकेका प्रति प्रहरीको कार्यशैलीमाथि प्रश्न गरे । 

उनले भेप सुन प्रकरणमा अहिले सरकारमा रहेका दलका नेताहरूलाई सरकारकै दवावमा पक्राउ गर्न नसक्दा प्रहरीले मिडिया प्रयोग गरेर सूचना सार्वजनिक गरिरहेको बताए । ‘भेप सुन प्रकरणमा संलग्न सरकारमा भएका दलका ठूला नेतालाई पक्राउ गर्न नपाएपछि प्रहरीले मिडियामार्फत सूचना बाहिर ल्याउनु परिरहेको छ’ उनले भने, ‘सरकारमा रहेका ठूला नेता पक्राउ गर्न प्रहरीले मिडिया ट्रायल गरिरहेको छ । यस्तो अवस्थामा प्रकरणमा निष्पक्ष छानबिन अनुसन्धान हुन्छ भन्नेमा विश्वास कसरी गर्ने ? यसमा गृहमन्त्रीको जवाफ चाहन्छु ।’

रास्वपाले सरकारको राम्रो काममा साथ र समर्थन गर्ने र गलतमा विरोध गर्ने बताए । उनले संसदीय समितिमा सभापति चयनमा रास्वपालाई बेवास्ता गरेबाट पार्टीलाई थप जिम्मेवार बन्न सघाउ पुर्याएको बताए ।

उनले राजनीतिक भागबण्डामा राज्यका निकायमा नियुक्त गरिएकै कारण तस्करी वा आपराधिक घटनामा निष्पक्ष छानबिन हुन नसकेको बताए ।

विद्युतीय चुरोट भेपमा राखेर भएको सुन तस्करी प्रकरणमा सरकारको नेतृत्व गरिरहेको माओवादी केन्द्रका उपाध्यक्ष कृष्णबहादुर महरा र उनका छोरा राहुलको संलग्नता रहेको नेपाल प्रहरीको केन्द्रीय अनुसन्धान ब्यूरो (सीआईबी)ले तयार पारेको अनुसन्धानमा उल्लेख छ । महरा बाबु छोरालाई पक्राउ गरेर अनुसन्धान गर्न एमाले लगायत प्रतिपक्षीहरु दलहरूले माग गर्दै आएका छन् ।