प्रतिपक्षी दल एमालेले संसद अवरुद्ध गर्ने भएपछि यसबारे छलफल गर्न सभामुखले बोलाए कार्यव्यवस्थाको बैठक

२४ साउन, काठमाडौं । प्रमुख प्रतिपक्षी दल नेकपा एमालेले आज पनि संसद बैठक अवरुद्ध गर्ने भएपछि यसबारे छलफल गर्न सभामुख देवराज घिमिरेले प्रतिनिधिसभाको कार्यव्यवस्था परामर्श समितिको बैठक बोलाएका छन् । सुन तस्करी प्रकरणको छानविनका लागि उच्चस्तरीय छानविन आयोग गठन गर्नुपर्ने माग राख्दै एमालेले साउन १० देखि संसद बैठक अवरुद्ध गर्दै आएको छ ।  

सभामुख देवराज घिमिरले बिहान साढे ११ बजे बस्ने गरी कार्यव्यवस्थाको बैठक बोलाएका हुन् । हिजो प्रमुख तीन दलका शीर्ष नेताको बैठक बसेपनि संसद खुलाउने विषयमा सहमति जुटेको थिएन । नयाँ बानेश्वरस्थित संघीय संसद भवनमा बैठक बस्ने सभामुखको सचिवालयले जानकारी दिएको छ ।

बैठकमा संसदको अवरोध हटाउने विषयमा छलफल हुनेछ । संसद बैठकअघि कार्यव्यवस्थाको बैठक बस्न लागेको हो । प्रतिनिधिसभाको बैठक आजै दिउँसो १ बजे बस्ने तय छ । करिब १०० किलो सुन तस्करी प्रकरणको छानबिनका लागि संसदीय समिति बनाउनुपर्ने माग गर्दै प्रमुख प्रतिपक्ष दल एमाले सांसदले संसद बैठक अवरुद्ध गर्दै आएका छन् ।