वाकीटकी बोकेर सडकमा देखिएका रास्वपाका कार्यकर्तामाथि प्रशासनको निगरानी

२४ साउन, काठमाडौं । वाकीटकीसहित सडकमा देखिएका राष्ट्रिय स्वतन्त्र पार्टी (स्वपा)का कार्यकर्तामाथि प्रशासनले निगरानी बढाएको छ ।

चितवनको नारायणगढ–मुग्लिन सडक खण्डकाे कालीखाेलामा मंगलबार पहिरो पञ्छाउने क्रममा रास्वपाका कार्यकर्ता पार्टीको चुनावचिन्ह घण्टी र र्यापिड एक्सन टिम (आरएटी) छापिएको वाटर प्रुफ ज्याकेट र हातमा वाकीटकी बोकेर तैनाथ भएको देखिएपछि चितवन प्रहरीले निगरानी सुरु गरेको हो । 

जिल्ला प्रमुख अधिकारी सुरेन्द्र पौडेलले बुधबार एक सूचना जारी गर्दै संचार सेट (वाकीटकी)सहित खानीखोलामा देखिएका अमुक दलका कार्यकर्ताको रुपमा देखिएका व्यक्तिहरुमाथि अनुसन्धान गर्न संचार सेट वैधानिक हो वा होइन जाँच गर्न निर्देशन दिएका छन् । 

साथै विपद्का घटनामा कुनै दल वा संगठनको परिचयबिना र विपद व्यवस्थापन समितिको स्वीकृतिमा विशुद्ध स्वयंसेवीका रुपमा मात्रै खटिन सक्ने जानकारी दिएका छन् ।