एमालेले नाराबाजी गरेपछि प्रतिनिधिसभा बैठक पुनः अवरुद्ध, शुक्रबारसम्मका लागि स्थगित

२४ साउन, काठमाडौं । प्रमुख प्रतिपक्षी दल नेकपा एमालेले आज पनि प्रतिनिधिसभा अवरोध गरेको छ । अवरोध पछि बैठक साउन २६ गते शुक्रबार बस्ने गरी बैठक स्थगित भएको छ । त्रिभुवन विमानस्थलबाट भएको सुन तस्करीको छानविन गर्न उच्चस्तरीय छानबिन समितिको माग गर्दै आएको एमालेले सोही माग अघि सार्दै प्रतिनिधिसभा बैठक अवरुद्ध गरेको हो । 

मंगलबारको बैठकमा दलीय प्रतिनिधित्वका नेताहरूले धारणा राखेपछि उपप्रधानमन्त्री तथा गृहमन्त्री नारायणकाजी श्रेष्ठले प्रतिनिधिसभाको बैठकमा त्यस विषयमा सरकारको धारणा राखेका थिए । तर, उपप्रधानमन्त्री श्रेष्ठले उच्चस्तरीय समिति गठनको प्रतिवद्धता नजनाएको भन्दै एमालेले बैठक अवरुद्ध गरेपछि आज दिउँसो १ बजेसम्मका लागि बैठक स्थगित गरिएको थियो ।

सभामुख देवराज घिमिरेले संसद जनताको थलो भएको बताउँदै अवरोध नगर्न एमाले सांसदहरुलाई अनुरोध गरेका थिए ।  उनले भने ‘ जनताको सर्वोच्च थलो हो संसद, यसलाइ अवरोध गरेर यसप्रतिको जनताको विश्वासमाथि खेलवाड गर्न हुँदैन । ’ 

आजको बैठकमा सभामुख घिमिरेले राष्ट्रपतिको कार्यालयबाट प्राप्त कार्यभार तोकिएको र विधेयक प्रमाणीकरण सम्बन्धी पत्रहरूको ब्यहोरा पढेर सुनाउने कार्यसूची रहेको थियो । प्रधानमन्त्री तथा मन्त्रिपरिषद्को कार्यालयबाट प्राप्त कार्यभार तोकिएको सम्बन्धी पत्रहरूको ब्यहोरा पढेर सुनाउने लगायतका कार्यसूची थिए ।