सरकारले गौरहत्याकाण्डमाथि अनुसन्धानको तयारी गरेपछि उपेन्द्रले सुरु गरे शीर्ष नेताहरुसँग छलफल

२४ साउन, काठमाडौं । २०६३ मा रौतहटको गौरमा २७ जना तत्कालीन माओवादीका २७ जना कार्यकर्ताको हत्या भएको घटनामाथि सरकारले अनुसन्धान गर्ने तयारी गरेपछि घटना एक पक्ष तत्कालीन जनाधिकार फोरमका अध्यक्ष समेत रहेका जसपाका अध्यक्ष उपेन्द्र यादवले मुख्य दलका नेताहरुसँग छलफल सुरु गरेका छन् । 

घटनाको अनुसन्धान गर्ने र दोषीलाई कारवाही गर्ने विषयमा घटनामा मारिएकाकाहरुको परिवार सदस्यका गृह मन्त्रालयले मंगलबार ५ बुँदे सहमति गरेको थियो । त्यसको भोलिपल्ट बुधबार बिहान अध्यक्ष यादवले सरकारका मुख्य घटक नेपाली कांग्रेसका सभापति शेरबहादुर देउवासँग भेट गरी घटनाका विषयमा छलफल गरेका छन् । 

यादवले हिजै देउवालाई फोन गरेर बुधबार भेटका लागि समय लिएका थिए । बुधबार बिहान प्रधानमन्त्री निवास बालुवाटारमा प्रधानमन्त्री प्रचण्डसँग छलफल सकेपछि देउवाले यादवसँग भेटेर घटनाका विषयमा छलफल गरेको स्रोतको भनाइ छ । 

यही विषयलाई लिएर यादवले पार्टीभित्र पनि छलफल थालेको बताइएको छ । सरकार अघि बढेमा जसपाले सरकार छाड्नुपर्ने सम्मको कुरा उठेको बताइन्छ । यादवले प्रमुख विपक्षी एमालेका अध्यक्ष केपी शर्मा ओलीसँग पनि छलफल गर्ने तयारी गरेको बताइन्छ ।

तत्कालीन पहिलो संविधानसभाको पहिलो निर्वाचनका क्रममा चुनावी सभा गर्ने विषयमा फोरम र माओवादीले एकै स्थानमा मञ्च बनाउने जिद्दी गर्दा दुवै पक्षबीच झडप हुँदा माओवादीका युवा उमेरका युवक र युवती गरी २७ कार्यकर्ताको चिर्पट र बाँसका भाटाले हिर्काएर निर्मम तरिकाले हत्या गरिएको थियो । हत्या फाेरमले भारतबाट ल्याएकाे मानिसहरूबाट गरिएकाे आरोप लगाइएको छ ।