कैदीबन्दीको मृत्युपछि संखुवासभा कारागारमा तनाव

२४ साउन, काठमाडौं । मंगलबार राति कारागारभित्र दुई जना कैदीबन्दीको मृत्युपछि संखुवासभाको जिल्ला कारागार खाँदाबारीमा तनाव उत्पन्न भएको छ । मृत्युका कारण पत्ता लगाउन बुधबार छानबिन समिति गठन गरेर अध्ययन सुरु भएको बेला कैदीबन्दीले प्रहरीमाथि ढुंगामुढा गरेका छन् । 

कैदीबन्दीकै कुटपिटबाट दुई जना कैदीबन्दीको मृत्यु भएको प्रारम्भिक अनुसन्धानमा देखिएपछि प्रहरीले कारागारका ९ कैदीलाई पक्राउ गरी हिरासतमा लिएपछि प्रहरीमाथि कारागारभित्रबाट कैदीहरुले ढुंगामुढा गरेको प्रहरीले जनाएको छ । 

मंगलबार राति कैदीबन्दी संखुवासभाको मादी नगरपालिका-५ का १९ वर्षीय विनोद तोलाङ्गी र नुवाकोट ककनी गाउँपालिका ७ का २८ वर्षीय आकाश बलामीको कैदीबाटै भएको कुटपिटबाट मृत्यु भएको पाइएको छ । घटनाको छानबिन गर्न जिल्ला सुरक्षा समितिको बुधबार बसेको बैठकले जिल्ला सहायक प्रमुख जिल्ला अधिकारी मोहनमणि घिमिरेको संयोजकत्वमा तीन सदस्यीय समिति गठन गरेको छ । 

प्रहरीका अनुसार बलामी र तोलांगीलाई मंगलबार राति कारागारको शौचालयको झ्याल फोडेर भाग्न खोज्ने क्रममा नियन्त्रणमा लिएर कारागार प्रशासनलाई बुझाएको थियो । सो राति उनीहरुको मृत्यु भएको हो । 

हत्या भएको भन्दै आफन्तले मृतक दुवै जनाको शव बुझ्न मानेका छैनन् । कारागार अहिले पनि अशान्त रहेको र सामान्य अवस्थामा ल्याउने कोशिस भइरहेको प्रहरीले जनाएको छ ।

यो पनि पढ्नुहोस