नेविसंघ समानान्तर समिति घोषणा गर्ने तयारी गरेकालाई सानेपामा प्रहरीले रोक्यो, भोलि देउवाको घर घेर्ने

२४ साउन, काठमाडौं । नेपाली कांग्रेसको पार्टी कार्यालय सानेपामा नेपाल विद्यार्थी संघ 'नेविसंघ'का दुई समूहबीच नाराबाजी भएको छ । दुजाङ शेर्पा नेतृत्वको ७११ सदस्यीय नेविसंघ र समानान्तर समिति घोषणाका लागि बुधबार दिउँसो पार्टी कार्यालय पुगेको दुवै समुहबीच नाराबाजी भएको हो । 

सोमबार पार्टी सभापति शेरबहादुर देउवाले विधान विपरीत नेविसंघको केन्द्रीय तदर्थ समिति विस्तार गरेको भन्दै असन्तुष्ट विद्यार्थीहरू विरोधमा उत्रिएका हुन् । 

विद्यार्थी नेताहरू योगेन्द्र रावल, अशोक विष्ट, विनोद शाही लगायतको समूह नेविसंघको समानान्तर कमिटी घोषणाका लागि सानेपा पुगेका थिए । प्रहरी परिचालन गरेर उनीहरूलाई पार्टी कार्यालय प्रवेशमा रोक लगाइएको छ । 

 
दुई समूहबीच झडपको अवस्था सिर्जना भएपछि प्रहरीले रोकेको थियो । पार्टी कार्यालय प्रवेशमा रोक लगाएपछि भोलि सभापति देउवाको घर घेर्ने नेता रावलले चेतावनी दिएका छन् । 

नियमित महाधिवेशन नहुँदा केही समयदेखि तदर्थ समितिकै भरमा नेविसंघ चल्दै आएको छ। सभापति देउवाले २०७८ चैत ९ मा नेविसंघ तदर्थ समिति अध्यक्षमा शेर्पालाई मनोनीत गरेका थिए।

शेर्पा अध्यक्ष रहेकै समितिलाई १६ महिनापछि गत सोमबार बेलुकी १० बजे सभापति देउवाले ७१० जना केन्द्रीय सदस्य मनोनीत गरेका थिए। अध्यक्ष शेर्पासहित नेविसंघ केन्द्रीय समिति ७११ सदस्यीय बनाएपछि विधान विपरीत भन्दै नेतृत्वको आलोचना भइरहेको छ।