प्रहरीको यातनाबाट कैदीबन्दीको मृत्यु भएको भन्दै परिवारले शव बुझेनन्

२५ साउन, काठमाडौं । संखुवासभा जिल्ला कारागार खाँदबारीमा मंगलबार राति मृत्यु भएको दुई कैदीबन्दीको परिवारले शव बुझ्न मानेका छैनन् । प्रहरीको यातनाबाट कैदीको मृत्यु भएको दाबी गर्दै उनीहरुले शव बुझ्न नमानेका हुन् । 

कारागारमा रहेका संखुवासभाको मादी नगरपालिका–५ का १९ वर्षीय विनोद तोलाङ्गी र नुवाकोटको ककनी गाउँपालिका–७ का २८ वर्षीय आकाश बलामीको मंगलबार राति कारागारभित्रै मृत्यु भएको थियो । प्रहरीले भने बुधबार बिहान अचेत अवस्थामा फेला परेको र जिल्ला असप्तालमा उपचारका क्रममा मृत्यु भएको दाबी गर्दै आइरहेको छ । तोलांगी बलात्कार र बलामी चोरी मुद्दामा कैद सजाय काटिरहेका थिए । 

प्रहरीले उनीहरु दुवै जना कारागारको शौचालय फोडेर भाग्न खोज्दा पक्राउ गरी कारागार प्रशासनलाई बुझाएको र राति नै दुवै जना अचेत भएको दाबी गरेको छ । प्रशासनलाई बुझाएपछि कैदीबन्दीबीच झडप भएको र त्यसक्रममा घाइते भएको पाइएको प्रहरीले बताउँदै आइरहेको छ । तर आफन्तले शवमा देखिएका गम्भीर चोट र निलडामलाई हेर्दा नियन्त्रणमा लिएर मनपरी तरिकाले चरम यातना दिएको र त्यसका कारण मृत्यु भएको दाबी गरेका छन् । अन्य कुनैपनि कैदीबन्दी घाइते नभएको समेत दाबी गरेका छन् । 

कारागारका अन्य कैदीबन्दी र स्थानीय प्रत्यक्षदर्शीले भने प्रहरीले दुवैजनालाई कुटपिट गरेको  बताएका छन् । कारागारका वरिपरिका बस्तीमा मानिसहरुले पनि मंगलबार राति कारागारभित्र २ जनालाई चार जना प्रहरीले बाँधेर चरम यातना दिइरहेको र खुट्टामा हान, खुट्टामा हान भन्ने सुनेको बताएका छन् । 

घटनापछि बुधबार बिहान जिल्ला सुरक्षा समितिको बैठक बसेर घटना छानबिन गर्न सहायक प्रजिअ मोहनमणि घिमिरेको संयोजकत्वमा ३ सदस्यीय समिति गठन गरेको र लगत्तै ९ जना कैदीलाई अनुसन्धानका लागि भन्दै हिरासतमा लिएका थिए । नाइके कैदीसमेतलाई हिरासतमा राखेपछि दिउँसो कारागारभित्र कैदीहरुले प्रहरीको यातनाबाट बलामी र तोलांगीको ज्यान गएको र त्यसको दोष आफूहरुलाई लगाउन खोजेको भन्दै प्रहरीमाथि भित्रैबाट नाराबाजी र ढुंगामुडा गरेका थिए । 

यातना दिन निर्देशन दिने प्रहरी अधिकारी र कुटपिटमा संलग्न प्रहरीमाथि कारबाहीको माग गर्दै कारागारका कैदीबन्दी अझै आन्दोलित छन् । दोषी प्रहरीलाई कारवाही हुनुपर्ने उनीहरुको माग छ । एक सय क्षमताको  जिल्ला  कारागारमा हाल आठ महिलासहित ढेड सय कैदीबन्दी राखिएका छन् ।