झापाकी क्यान्सरपीडित सोनिया भरतपुरको होटलमा मृत भेटिइन्

२५ साउन, काठमाडौं । पाठेघरको क्यान्सरको उपचारका लागि चितवन पुगेकी झापाकी एक महिला भरतपुरस्थित एक होटलमा मृत फेला परेकी छन् । भरतपुरस्थित माडी पाहुना घर एण्ड लजमा झापाको भद्रपुर नगरपालिका निवासी ४० वर्षीया सोनिया पोखरेल मृत अवस्थामा भेटिएकी हुन् । 

सोनिया उपचार गर्न श्रीमान सुर्य पोखरेलसहित साउन २० गते भरतपुरस्थित बीपी कोइराला मेमोरियल क्यान्सर अस्पताल पुगेकी थिइन् । सुरुदेखि नै दम्पत्तिले उक्त होटलमा कोठा लिएका थिए । 

बुधबार साँझ अस्पताल जान्छु भनेर हिँडेका सूर्य बिहीबार बिहानसम्म पनि नदेखिएपछि होटल संचालकले कोठामा हेर्न जाँदा श्रीमती सोनिया मृत अवस्थामा देखेपछि प्रहरीलाई खबर गरेका थिए । सूर्य अहिलेसम्म पनि फेला नपरेको चितवन प्रहरीले जनाएको छ । 

सोनियाको शव पोस्टमार्टमका लागि प्रहरीले जिल्ला अस्पताल पठाइएको छ । बेपत्ता सूर्यको खोजी भइरहेको प्रहरीले जनाएको छ ।