अमेरिका अब हार्डवेयरसहित नेपाल छिर्दैछ : नेकपा

२५ साउन, काठमाडौं । नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टी (नेकपा)ले अमेरिका विकासको नाममा नेपालमा हार्डवेयरसहित छिर्न खोजिरहेको बताएको छ । मंगलबार सुरू भएर जारी रहेकाे  पार्टीको केन्द्रीय प्रतिनिधिहरुको बैठकमा धारणा राख्दै नेता कर्णजित बुढा ‘सुशिल’ले अमेरिकी साम्राज्यवाद नेपालमा एमसीसीको नाममा सफ्टवेयरमार्फत छिरेको र अब उसले हार्डवेयर (सैन्य)मार्फत छिर्ने कोशिस गरिरहेको बताए । 

अमेरिकाले विश्वभर सैन्य र आर्थिक मामिलामा पकड जमाउने रणनीतिमा निरन्तर लागिरहेको र नेपालमा सत्ताका संरचना, प्राविधिक र राजनीतिक दलहरूलाई आर्थिक प्रभावमा पारेर सैन्य शक्तिसहित आउने योजना बनाएको बताए । 

मुलुकमा साम्राज्यवाद र विस्तारवादलाई रोक्न नेपालीलाई विचार र प्राविधिक रुपले बलियो बनाउनुको विकल्प नरहेको प्रशिक्षणमा उनले बताए । त्यसनिम्ति नेकपाले वैचारिक र रणनीतिक रुपमा अगाडि बढ्ने नीति लिएको बताए । नेपाल सरकारले सम्झौता गरेर कार्यान्वयनको चरणमा रहेको अमेरिकी मिलिनियम च्यालेञ्च कर्पोरेसन (एसीसी)अन्तर्गतको परियोजना सम्झौताको खुलेर विरोध गर्नेमा नेकपा अग्रपंक्तिमा रहेको छ । उसले प्रसारण लाइन र ग्रामिण सडक निर्माणका लागि भनी गरिएकाे एमसीसी परियाेजना सम्झाैतालाइ राष्ट्रघाती सम्झाैता भनेकाे छ । महासचिव विप्लवले प्रशिक्षण दिएपछि बैठक बिहीबार सकिँदैछ ।

तत्कालीन सशस्त्र द्वन्द्वमा सक्रिय भूमिका निर्वाह गरेका हुम्लाका बुढा पछिल्लो चरणमा पार्टी एकता गरेर नेकपामा पुगेका हुन् । नेकपाले केन्द्रीय समितिपछिका संरचनाको रुपमा केन्द्रीय प्रतिनिधि समिति खडा गरिएको छ । जसलाई नेपाली कांग्रेसको महासमिति जस्तै भएको टिप्पणी हुदै आएको छ ।