साझा भण्डार सहकारीका तत्कालीन अध्यक्ष खडकाविरुद्ध भ्रष्टाचार मुद्दा

२५ साउन, काठमाडाैं । साझा भण्डार सहकारी संस्था सुर्खेतका तत्कालीन अध्यक्ष जयकुमार खड्काविरुद्ध भ्रष्टाचार मुद्दा दायर भएको छ । अख्तियार दुरुपयोग अनुसन्धान आयोगले बिहीबार विशेष अदालतमा मुद्दा दायर गरेको हो । अन्य ८ जनाविरुद्ध पनि खडकासँगै साथमा आरोपपत्र राखेर भ्रष्टाचार मुद्दा दायर गरिएको छ । संस्थाकाे सुर्खेतको वीरेन्द्रनगर नगरपालिका–८, स्थित २ रोपनी जग्गा र बाँके कोहलपुरको दुई कठ्ठा १७ धुर जग्गा कम मूल्यमा विक्री गरी आर्थिक हिनामिना गरेको आरोप उनीहरुविरुद्ध लगाइएको छ । 

अन्य आरोपीहरुमा तत्कालीन सदस्य सचिव तथा महाप्रबन्धक अमर थापा, सञ्चालक समिति सदस्यहरू आत्माराम राजवंशी, सुवर्ण मानन्धर, लक्ष्मण थापा, भोलाप्रसाद न्यौपाने, गीतकुमारी शाही लगायत छन् । निकै कम मूल्यमा जग्गा बिक्री गरी संस्थालाई ४ करोड चार लाख २४ हजार १८१ रुपैयाँ हानी नोक्सानी पुर्‍याएको अख्तियारको दाबी छ ।

गीतकुमारीविरुद्ध भने बोलपत्रमा अरुको नामको प्रतिस्पर्धा र सहभागिता देखाई मिलेमतो गरी न्यून मूल्यमा जग्गा खरिद गरी संस्थालाई हानिनोक्सानी पुर्‍याएको आरोपमा मुद्दा चलाइएको छ ।